اسلام آباد۔ 16 اگست (اے پی پی) پاکستان کرکٹ ٹیم انا پنی آ فاسٹ باؤلر وہاب ریاض جہانی کرکٹ آن ریٹائرمنٹ نا پڑو ءِ کرے۔ 38 سال انا وہاب ریاض تینا ٹویٹ اٹی انٹرنیشنل کرکٹ ءِ اِلنگ نا فیصلہ نا بابت معلومدار کرے۔ او فرنچائز کرکٹ گوازی کننگ ءِ برجاتخک۔ اوپارے کہ ای پاکستان کرکٹ بورڈ (پی سی بی ) کوچ و تینا خاہوت نا منت واری ءِ ہرفیوہ۔ وہاب ریاض نوشتہ کرے کہ مینٹورز، سنگت ، و ہرافک کنا دا سفر اٹی کنے سپورٹ کریر، ہموغٹ انا منت واری ءِ ہرفیوہ۔ اومستی نوشتہ کرے کہ فرنچائز کرکٹ اٹ بروک آ وخت بھاز جوان ءِ۔ یات سلے کہ کرکٹر وہاب ریاض پنجاب نا نگران حکومت اٹ وزیراعلیٰ نا سلاہکار نا فرض ءِ سرتننگ اٹی ءِ۔ اوپارے کہ ای تدوک آ اِراسال آن تینا ریٹائرمنٹ نا ڈٹ آتا بارواٹی کریٹہ کہ 2023اٹی انٹرنیشنل کرکٹ آن ریٹائرمنٹ ہلنگ نا کنا ہدفءِ، و کنے دا ہیت انا خوشی ءِ کہ ای تینا ملک و قومی ٹیم انا گچین خذمت ءِ کرینٹ۔ جہانی کہول آ پاکستان نا نمائندگی ءِ کننگ کنکن بھاز بھلو شرفمندی نا ہیت اسے۔ وہاب ریاض تینا 15 سال انا انٹرنیشنل کرکٹ کیریئر اٹی پاکستان کن 27 ٹیسٹ، 91 ون ڈے و 36 ٹی 20 میچ گوازی کرے۔ وہاب ریاض جم وڑاٹ ٹیسٹ کرکٹ اٹ 34.50 نا اوسط آن 83 وکٹ ہلک ، او ون ڈے ٹی 34.30نا اوسط آن 120 وخت اس کہ ٹی ٹونٹی ٹی 28.55 نا اوسط آن کل 34 وکٹ ہلک۔
