اسلام آباد۔ 27مئی (اے پی پی) ڈٹ بندی شونداری واصلاحات نا بنجائی وزیر احسن اقبال پارینے کہ 2017-18ءنا بجٹ الس دوست و شونداری ئُ بجٹ اسے۔ تینا اسہ بیان اسے ٹی اوپارے کہ ملک انا تاریخ اٹی اولیکو وار سرکاری بشخ انا شونداری پروگرام (پی ایس ڈی پی) کن اسہ کھرب روپئی آن زیات نا بجٹ جتا کننگانے وخت اس کہ غٹ صوبائی شونداری بجٹ ئِ اوار کننگ آن پد بروک آ مالی سال اکن شونداری بجٹ نا جم اٹنگا کچ 2.5کھر ب روپئی آن گدرینگک۔ اوپارے کہ 10 سال آن پد جم اٹنگا قومی پیداوار اٹی 5درسد نا ودکی ریکارڈ کننگانے ہرابروک آ سال 6درسد آن ودک۔ بنجائی وزیر پارے کہ ہائیر ایجوکیشن کمیشن نا بجٹ اٹی 66درسد نا ریکارڈ ودکی کننگانے ہراڑآن ورناتا آخبت ئِ تابناک جوڑ کننگ اٹی کمک رسینگک۔ اومستی پارے کہ حکومت چین پاکستان اقتصادی راہداری (سی پیک) نا بھلا ڈٹ آتے کن 180 ارب روپئی جتا کرینے ہراڑآن ملک اٹی شونداری و شونہالی نا پوسکن آ کسرآک ملنگرہ۔
