اسلام آباد۔ 27مئی (اے پی پی) قومی احتساب بیورو (نیب) نا چیئرمین قمر زمان چوہدری پارینے کہ بدعنوانی غٹ برائی تا ماس ئِ۔ نیب بدعنوانی و کرپشن تون آہنی دوتے اٹ مون ایتک انتئے کہ بدعنوان عنصرآتے اوفتا کروک نا سزا تننگ ننا قومی فرض ئِ۔ نیب ہیڈکوارٹر اٹی 15دے ئی جاچ دیوان نا ساڑی مروک آتیان تران کرسا چیئرمین نیب پارے کہ نیب انا چیئرمین نا زمواری تے سنبھالنگ آن پد بدعنوانی تدارک کن تزویراتی حکمت عملی اس مرتب کرے و ہر غاو آ کارروائی کن مسہ جتا مرحلہ غاتا لائحہ عمل اسے آ عملدرآمد جاری ئِ ہرانا رداٹ اولیکو مرحلہ ٹی غاو تا پک مننگ و ولدا انکوائری اوکان پد جاست وپاست کننگک۔ اوپارے کہ گدرینگوک آ مسہ سال انا حساب وکتاب داہیت انا گواہ ئِ کہ نیب انا غٹ عملہ اواری اٹ سخت خواری اٹ کاریم کرینو و کرپشن نا چٹفنگ ئِ اسہ قومی ئُ فرض اس سرپند کرسا ادا کننگ انگ ئِ۔ اوپارے کہ غاو تا وصولی ٹی مروک آ ودکی آن نیب آ الس نا ودوک آ پت انا درشانی مریک۔ پلڈ اٹ نا رپورٹ نا حوالہ ئِ ترسا چیئرمین نیب پارے کہ نیب آ 42درسد خلقت پت انا درشانی ئِ کیرہ وخت اس کہ پولیس آ پت انا درشانی ئِ کروک آتا شرح 30 درسد و ایلو سرکاری ادارہ غاتیا پت انا شرح 29 درسد ئِ۔
