خراج وصولی تا تخمینہ 4013ارب، ترسیلات زر انا تخمینہ 837ارب 80 کروڑ روپئی خلنگا ، کشت وکشار ، صنعت ، برآمد آتون اوار ایلو بشخ آتیا آسراتی تا پڑو
دفاعی بجٹ اٹی 79 ارب روپئی نا ودکی، پاک فوج انا افسر و ورناتے کن ضرب عضب اسپیشل الاﺅنس نا وراٹ 10 درسد ودکی ناپڑو
سرکاری ملازم آتا پنداوڑی تیٹی 2010ءنا 50 درسد ایڈ ہاک الاﺅنس ضم کرسا داڑ10 درسد ودکی ، بیت المال و بے نظیر انکم سپورٹ پروگرام تون اوار راجی رکھ انا بشخ آتا بجٹ اٹی نمان ودکی
اسلام آباد۔ 26مئی (اے پی پی) بروک آ مالی سال 2017-18ءنا 5 ہزار 310 ارب روپئی حجم نا بنجائی بجٹ ئِ پیش کننگا۔ سرکاری ملازم آتا پنداوڑی تیٹی 2010ءنا 50 درسد ایڈہاک الاﺅنس ضم کرسا داڑآ 10 ودرسد ودکی کننگانے، دفاعی بجٹ اٹی 79 ارب روپئی نا ودکی کننگانے ، خراج وصولی تا تخمینہ 4013ارب روپئی خلنگانے، ترسیلات زر انا تخمینہ 837ارب 80 کروڑ روپئی خلنگانے، کشت وکشار، صنعت ، برآمد آتون اوار ایلو بشخ آتیا آسراتی تا پڑو کننگانے۔ بیت المال و بے نظیر انکم سپورٹ پروگرام تون اوار راجی رکھ انا بشخ آتا بجٹ اٹی نمان ودکی کننگانے، پاک فوج انا افسر وورناتے کن ضرب عضب اسپیشل الاﺅنس نا وڑاٹ 10 درسد ودکی نا پڑو کننگانے وخت اس کہ وزیر خزانہ قوم آن خواست کرے کہ او معاشی وژن نا دوئی کن یکجا و یکسو مرسا مون آ بریر۔ جمعہ نا دے قومی اسمبلی ٹی بروک آ مالی سال 2017-18ءنا بجٹ ئِ پیش کرسا بنجائی وزیر خزانہ سینیٹر اسحاق ڈار پارے کہ پاکستان نا تاریخ اٹی اولیکو وار اسہ گچین مروک وزیراعظم و وزیر خزانہ پدریسہ پنچ میکو بجٹ ئِ پیش کننگ ئُ۔ دا گڑاسوگو جمہوریت نا عکاسی ئِ کیک ہراڑآ مچ آ قوم فخر کننگ کیک۔ ای بھاز عاجزی اتون اللہ تعالیٰ نا شکر ئِ ادا کیوہ کہ او کنکون آ ناچیز ئِ داموقع ئِ تس۔ داوخت آ اوگدرینگوک آ چار سال انا معاشی کارکڑد نا بارواٹی ہم معلومدار کرے۔ اوپارے کہ اینو پاکستان ترند تر شونداری نا کسر آ روان ئِ۔ دا سال ننا جی ڈی پی ٹی ودکی نا شرح 5.3درسد ئِ ہراکہ گدرینگوک آ دہ سال اٹی شونداری نا بڑزکو انگا شرح ئِ ۔ زرمبادلہ نا کوڑی مناسب کہول آٹی ئِ ہراکہ چار تُو انا درآمد آتے کن کافی ئُ۔ گدرینگوک آ چار سال اٹی خراج وصولی تیٹی 81درسد ودکی مسنے ہرا اوسطاََ 20 درسد سالانہ ودکی ئِ۔ 2013ءآن داوخت اسکان پرائیویٹ سیکٹر ئِ کڑزآتا فراوانی ٹی پنچ گناآن زیات نا ودکی مسنے۔ مالیاتی نسخان کم و ود 4.2درسد مریک۔ داسال مشینری نا درآمد اٹی 40 درسد آن زیات ودکی مسنے۔ گیس انا فراوانی گچین مسنے و صنعت کن لوڈشیڈنگ پورو وڑاٹ چٹانے وخت اس کہ واپاری و اُرائی صارف آتے کن لوڈشیڈنگ اٹی صفا ئُ کمتی اس مسنے ۔ انشاءاللہ بروک آ سال لوڈشیڈنگ نا پورو چٹفنگ نا سال مریک۔ وزیر خزانہ پارے کہ پاکستان نا 2030ءاسکان دنیا نا 20 بھلا اقتصادی طاقت(G-20) ٹی اوار مننگ نا پیشن گوئی کننگ انگ ئِ۔ مچ آ قوم دا زہمی کن بدلی نا کریڈٹ نا حقدار ئُ۔ اوپارے کہ دا معزز ایوان، وزیراعظم محمد نواز شریف و مچ آ قوم ئِ مبارکباد پیش کیوہ کہ اسہ بھلو وخت اسے آن پد داسال حکومت پاکستان اولیکو وار بیرہ قومی شونداری کن کڑز ہلکونے۔ مست نن نئے بیرہ شونداری گرج بلکن غیر شونداری خڑچ آتے کن ہم کڑز ہلکونہ۔ دا کڑزآک ننے معاشی تنزلی نا کنڈآن دریرہ ہراڑے ننے روزمرہ خڑچ آتے پورو کننگ کن وام ہلوئی تماکہ و داکڑز آتیا کٹیا نا ادائیگی ٹی بجٹ نا بھلو بشخ اس خڑچ کروئی تماکہ۔ دا بدلی گچین مالیاتی انتظام ، محاصل ئِ ودفنگ آ ٓخبتی توجوہ تننگ و غیر شونداری خڑچ آتیٹی کمتی کننگ آن دوئی مسنے۔ دا چنکو سرسہبی اس اف، حکومت یاادارہ اسے کن شونداری مسخت آتے کن وام ہلنگ اٹی ہچ ئُ عاراس اف انتئے کہ راجی و معاشی فوائد داڑآ تروک آ مارک اپ آن زیات مریک۔ پاکستان نا الس و ملک انا بنداوی ڈھانچہ آ زرکاری آن ترندتر، پائیدار و اجتماعی شونداری دوئی مریک۔ اسحاق ڈار پارے کہ داسال جی ڈی پی ٹی ودکی نا شرح 5.28درسد مس ہراکہ گدرینگوک آ دہ سال انا بڑزکو انگاشرح ئِ۔ چار سال مست معاشی شونداری نا شرح 3.68درسد ئس۔ اینخو سال جہانی معیشت اٹی 3.5 درسد نا شرح آن ودکی نا گمانی ئِ۔ دا تناسب نا تقابلی جاچ ئِ ہلنگ آن معلوم مریک کہ پاکستان نا معاشی کارکڑد دنیا نا گیشتر ملک آتا کارکڑد آن گچین مسنے۔ معاشی شونداری نا بڑزکو شرح نا سوب پاکستان اٹی ہر لحاظ آن گچینی بسنے۔ اولیکو وار پاکستان نا معیشت نا حجم 300 ارب امریکی ڈالر آن گدرینگانے۔ وزیر خزانہ پارے کہ حکومت معیشت نا سوگوی کن مالیاتی نظم ونسق آ سختی اٹ عمل کرے ہراٹی نسخان مالی سال 2012-13ءٹی 8.2درسد آن کم مرسا اینخو سال اٹی 4.2 درسد سلیسونے۔ نن دا سرسہبی ئِ محصول آتا وصولی ٹی ودکی آن کرین ہرانا بنداو انتظامی معاملہ غاتیٹی گچینی بس۔ اسحاق ڈار پارے کہ ملک اٹی کمپنی تے کن کاروباری آسانی ودی کننگ کن اصلاحات کننگ انگ ئِ ہراٹی جہانی بینک انا کاروباری آسانی نا درجہ بندی ٹی پاکستان نا رینکنگ اٹی چار درجہ گچینی بسنے۔ معیشت ئِ دستاویزی دروشم اس تننگ نا است بڈی کن اولیکو وار 40,000 روپئی مالیت نا رجسٹرد بانڈ جاری کننگانے۔ مالی سال 2017-18ءٹی چندی مالیت نا ایلو رجسٹرڈ بانڈ ہم درستی راستی کرفنگک۔ اوپارے کہ وزیراعظم محمد نواز شریف نا سروکی و کیبنٹ کمیٹی توانائی نا کمک اٹ اونا جندی چاروکی ٹی 2018ءنا تیرمہ ٹی ساڑی آ 5سالہ مد انا ایسری اسکان کم وود 10,000 میگاواٹ ودکی بجلی نیشنل گریڈ اٹی اوار کننگک۔ انشاءاللہ داڑآن لوڈشیڈنگ نا چٹفنگ ممکن مریک۔ ایئر پورٹ ، ہسپتال و دیر ئِ صاف کننگ کن پلانٹ تون اوار گوادر نا شونداری کن زرکاری کننگک۔ کم و ود 55لکھ ہندن ئُ خاہوت ہرافتے تون ذریعہ معاش اف اوفتے کن سالانہ 19.338 روپئی فی خاہوت بذریعہ خاتون خانہ مالی کمک جاری تخنگک۔ دامسخت کن بے نظیر انکم سپورٹ پروگرام کن 121ارب روپئی جتا کننگ نا سلاہ ئِ ہراکہ 2013ءنا 40 ارب روپئی نا مقابلہ ٹی 300 درسد ئِ۔ 2013ءٹی فائدہ ہرفوک آ خاہوت آتا کچ 37لکھ ئس ہراکہ داسہ 55لکھ مریک۔ داکان بیدس پرائمری اسکول آتا 13لکھ چناتے مالی کمک فراوان کننگ انگ ئِ۔ اسحاق ڈار پارے کہ حکومت 300 یونٹ ماہانہ بجلی کاریم اٹ اتوک آ کم کٹیا صارف آتا بجلی نا بل آتا ادائیگی ئِ سبسڈی نا دروشم اٹ برجاتخک۔ بلوچستان نا بزغرآتے کن کشاری ٹیوب ویل تا بجلی نا کاریم اٹ اتنگ آ بنجائی حکومت سبسڈی ئِ برجاتخک وخت اس کہ مچ آ ملک اٹی کشاری ٹیوب ویل آتے کن 5.35روپئی فی یونٹ OFF Peak ریٹ بروک آ مالی سال اٹی ہم برجاءسلک۔ دامسخت کن بروک آ مالی سال انا بجٹ اٹی 118 ارب روپئی جتا کننگانے۔ اوپارے کہ وزیراعظم نا چندی اسکیم تے کن دا مالی سال اٹی 20 ارب روپئی تخنگ انگ ئِ۔ اوفتے ٹی بزنس لون اسکیم، انٹرسٹ فری لون اسکیم، ٹریننگ سکیم، سکل ڈویلپمنٹ پروگرام، فیس واپسی اسکیم و لیپ ٹاپ پروگرام اوار ئُ۔ اسحاق ڈار پارے کہ حکومت راج انا کم کٹیا تپہ غاتے معاشرتی رکھ فراوان کننگ ئِ ہموڑے بے نظیر انکم سپورٹ پروگرام آن فائدہ ہرفوک آتا پوسکن ئُ ہنر ہیل کننگ و تینا کاروبار نا بنائِ کننگ نا است بڈی ہم کننگ ئِ تانکہ او تینا نت تیا سلنگ کیر۔ دا چرجوئی ٹی حکومت اسہ پوسکن ئُ اسکیم اس درستی راستی کرفنگ ئِ۔ بروک آ سال بی آئی ایس پی آن فائدہ ہرفوک آ دُن انگا خاہوت آتے تربیت و 50 ہزار روپئی نا مالی کمک فراوان کننگک ہرا تینا ذاتی کاروبار اس شروع کننگ خوارہ۔ بنائی وڑاٹ 250,000 خاہوت آتے دا گرانٹ تننگ نا سلاہ ئِ۔ بجلی نا ترسیلی نظام آن مری آ رہینگوک آ چنکا شارتا رہینگوک آتے بجلی نا فراوانی کن حکومت ورلڈ بینک نا کمک اٹ شمسی توانائی آن چلینگوک آ آف گریڈ نظام اس درستی راستی کرفک۔ دا گام اٹی بلوچستان آ خصوصی چکار تخنگک۔ اوپارے کہ کشاری بشخ اٹی پین گچینی کن حکومت 2016-17نا بجٹ نا کمک اٹ چندی پوسکن ئُ گام گیج ہلک ہرافتے ٹی کراپ لون انشورنس اسکیم، لائیو اسٹاک انشورنس اسکیم، ڈیری مصنوعات ، لائیو اسٹاک و پولٹری آ کسٹم ڈیوٹی ٹی رعایت ، جراثیم کش دوائی تیا سیلز خراج نا چٹفنگ و کھد انا نرخ اٹی کمتی قابل ذکر ئِ۔ نتیجتاََ یوریا کھد 1800 روپئی فی گونی آن کم مرسا 1400 روپئی و ڈی اے پی 4200 آن کم مرسا 2500 روپئی مریک۔ اسحاق ڈار پارے کہ سویلی کوریا نا کمک اٹ 6ارب روپئی نا خڑچ آن اسلام آباد اٹی آئی ٹی سافٹ ویئر پارک اس اڈ تننگک۔ لس بندغ نا آسراتی کن موبائل کال آ ودہولڈنگ خراج ئِ 14درسد آن کم کرسا 12.5 درسد و ایکسائز ڈیوٹی ئِ 18.5درسد آن کم کرسا 17 درسد کننگ نا فیصلہ کننگانے۔ جدید/سمارٹ فون انا کاریم اٹ اتنگ ئِ مون آ دننگ کن کسٹم ڈیوٹی ئِ 1000 روپئی آن کم کرسا 650 روپئی کننگک۔ موبائل ٹیلی فون کمپنی تا گڑاتا درآمد آ ڈیوٹی ئِ کم کننگ انگ ئِ۔ اسحاق ڈار پارے کہ ریلوے مسافر و گڑاتا ہڑزانی، ترند رفتار و آرام دہ ترسیل نا ذریعہ ئِ۔ ہنداخاطران دانا شونداری ننا حکومت نا اہم الیت ئِ۔ گدرینگوک آ 4سال اٹی ریلوے ٹی متاثر کن بدلی اتنگانے۔ ہر سال کٹیا ودنگ ئِ۔ مسافر و گڑاتا ہن و بر کن نت نئی خذمت آتا اجراءکننگ انگ ئِ و پوسکن ئُ انجن و بوگی اوار کننگ انگ ئِ۔ حکومت دا قومی میرات ئِ دُوارہ بحال کننگ کن پرعزم ئِ۔ بروک آ مالی سال اٹی 42.9 ارب روپئی جتا کننگ نا سلاہ ئِ۔ اسحاق ڈار پاکستان دہشت گردی نا جہانی جنگ اٹی صف اول نا ریاست نا کڑد ئِ ادا کننگ ئِ۔ جون 2014ءٹی حکومت قطبی وزیرستان و ایلو قبائلی علاقہ غاتیٹی دہشت گرد آتا رکھوک پناہ گا ہ تا برخلاف بھلو کارروائی اسے نا فیصلہ ئِ کرے و پاک فوج آپریشن ضرب عضب نا بنائِ کرے۔ قوم ئِ فخر ئِ کہ پاکستان نا بہادر فوج ڈکھوکی اٹ جلہو کروک آ لغور دشمن ئِ شکست فاش تس۔ کسس خلنگا و کسس ہلنگا و کسس نرا۔ دا فتح ننا بہادر فوجی تا خواری تا نتیجہ ئِ۔ اینو مچ آ دنیا ئِ دہشت گردی نا مون تروکی ئِ۔ ولے اسہ فوج اس ہم دہشت گرد آتا برخلاف داخہ جامع فتح دوئی کتنے۔ اوپارے کہ قوم انا بہادر سپوت آتا بے پناہ قربانی تا اعتراف نا وڑاٹ ای وزیراعظم نا کنڈآن پڑو کیوہ کہ پاکستان نا فوج نا غٹ افسر و ورناتے تنخواہ نا 10 درسد ضرب عضب اسپیشل الاﺅنس تننگک۔ دا الاﺅنس تنخواہ تیٹی ودکی نا بابت آن ہرا پڑو ئِ کننگک اوڑآن بیدس ئُ۔ اوپارے کہ آپریشن ضرب عضب کون آ بھلا قومی گام اکن وسیع مالی وسیلہ درکار مریک۔ دہشت گردی نا برخلاف دااسہ قومی ئُ فرض اسے ہراڑکن وسیلہ غاتا فراوان کننگ مچ آ قوم آ لازم ئِ۔ وزیر خزانہ پارے کہ پاکستان مسلم لیگ (ن) نا حکومت 1999ءٹی بناءکروک اسکیم ئِ دُوارہ درستی راستی کرفنگ نا فیصلہ کرینے۔ دا اسکیم نا رداٹ جنوزان تا زمہ ایچ بی ایف سی نا مورٹ گیج نا واجبات آتے حکومت ادا کیک۔ داوار دا اسکیم نا رداٹ وام ادائیگی نا حد مسہ نیم لکھ آن ودفسا 5لکھ کننگانے۔ البتہ 2009ءو 2010ءناپاکستان نا فوج و سول ملازم آتے کن 2010ءنا ایڈ ہاک ریلیف الاﺅنس ضم کننگ تویسس انتئے کہ دا بھلو الاﺅنس اس ئس۔ داچرجوئی ٹی تسلسل آن سفارش موصول مسکہ۔ کنے اینو دا پڑو کرسا خوشی مننگ ئِ کہ حکومت دافیصلہ ئِ کرینے کہ دا الاﺅنس ہم تنخواہ ٹی ضم کننگک و ضم آن پد انا بنداوی تنخواہ آ 10 درسد ایڈہاک ریلیف الاﺅنس 2017 ءتننگک۔ پاکستان نا فوج اکن ضرب عضب الاﺅنس ہرانا ای مہالو ذکر ئِ کرینٹ او داڑآن بیدس ئِ۔ پنشن اٹی ہم 10 درسد ودکی کننگ انگ ئِ، بی پی ایس 5انا ملازم آتے 5درسد ہاﺅس رینٹ الاﺅنس نا کٹوتی آن مستثنیٰ کننگ انگ ئِ۔ ڈیلی الاﺅنس نا ریٹ ئِ ودفنگ انگ ئِ ہرانا ودکی نا شرح 60 درسد سلاہ کننگ انگ ئِ، اردلی الاﺅنس ئِ 12,000/-آن ودفسا 14,000روپئی کننگ انگ ئِ ، میت نا منتقلی و تدفین نا ساڑی آ شرح ئِ 1,600 روپئی آن 4,800و 5,000روپئی آن 15,000 روپئی کننگ انگ ئِ۔ ننا ایمان ئِ کہ رسول اللہ ﷺ نا اسوہ حسنہ ننکن گچین ئُ نمونہ اسے۔ مچ آ دنیا نا مسلمان و غیر مسلم دا منرہ کہ رسول اللہ ﷺ نا حیات مبارکہ ٹی ریاست مدینہ تاریخ انسانی ٹی ریاست نا گچین ئُ ماڈل اس ئس۔ او ماڈل ہم ہنداخہ ہی تعلقدار ئِ ہراخس مہالو وخت اس ئس۔ ننے تینا پالیسی ٹی دا مثالی ریاست نا روح ئِ بایدے اوار کننگے ہرانا طرہ امتیاز کانود نا حکمرانی ، شفافیت ، میرٹ نا نفاذ ، راجی رکھ و گچین حکمرانی ئس۔ اگہ نن دا ماڈل آ عمل کین تو کنا ایمان ئِ کہ نن قائد اعظم و علامہ اقبال نا تغ انا تعبیر ئِ ممکن کرسا نشان اتینہ و پاکستان ئِ زوت اسہ وت واجہ ، شونہال ، باوقار و شون ہلوک ملک اس جوڑ کینہ۔
