اسلام آباد۔25مئی (اے پی پی) ترک عدلیہ نا 13باسکی ڈل موسی ہیبت نا سروکی ٹی پنچ شنبے نا دے اسپیکر قومی اسمبلی سردار ایاز صادق تون پارلیمنٹ ہاﺅس اٹی اوڑدہی کرے۔ اسپیکر پارے کہ پاکستان و ترکی نا نیام اٹ تاریخی دوستانہ تعلقداریک ساڑی ئُ ہراوخت اناہر آزمائش آ پورو سلیسنو۔ اوپارے کہ پاکستان و ترکی نا نیام اٹ کثیر الجہتی تعلقداری اسیجائی مفادات، السی رابطہ و اسیجائی دودوربیدہ نا سوگو بنداوآتیاٹی ئُ۔ اوپارے کہ السی ، پارلیمانی ، واپاری، عدلیہ و ایلو بشخ آتا نیام اٹ خڑکی رابطہ ہڑتوم آ ملک آتے پین خڑک اتنگ اٹی اہم کڑد ادا کننگ کیک۔ سردار ایاز صادق پارے کہ پاکستان و ترکی علاقائی چیلنج آتا مقابلہ ئِ کننگ کن پائیدار شریداری کن پرعزم ئُ۔ اوپارے کہ پاکستان نا اسٹریٹجک شمارتیٹی ترکی ئِ بے کچ ئُ اہمیت اس دوئی ئِ۔ اوپارے کہ پائیدار شریداری جمہوریت، علاقائی سیاست، شونداری و اپار نا اسیجائی نقطہ نظر کن المی ئِ۔ اسپیکر 15جولائی 2016ءنا بغاوت ئِ بے سہب جوڑ کننگ آ ترکی نا الس و جمہوری نمائندہ غاتا جیرت ئِ خراج تحسین پیش کرے۔ اوپارے کہ دنیا 15جولائی نا نن انسانی عزم و قربانی تا لازوال مثال نا مشاہدہ ئِ ہراغٹ اکن تقلید نا قابل ئِ۔
