اسلام آباد۔ 25مئی (اے پی پی) بروک آ مالی سال 2017-18ءنا کم و ود 48کھرب روپئی کچ انا بنجائی بجٹ ئِ اینو(جمعہ نا دے) پارلیمنٹ اٹی پیش کننگک۔ بنجائی وزیر خزانہ سینیٹر اسحاق ڈار ساڑی حکومت نا پدریسہ پنچ می بنجائی بجٹ ئِ پیش کیک۔ پوسکن آ سال انا بجٹ اٹی بڑز اقتصادی شرح نمو، مالیاتی نظم و نسق ئِ برقرار تخنگ،غیر شونداری خڑچ آتیٹی کمتی ، برآمد و زرکاری نا مون آ دننگ، لس خلقت ئِ ریلیف نا فراوانی، الس دوست پالیسی تا کمک اٹ راجی و اقتصادی گچینی کن پین گام گیج آتیا چکار تخنگک۔ بجٹ انفراسٹرکچر و انسانی وسیلہ غاتا شونداری آن بیدس راج انا نیزگار و محروم تپہ غاتے زیات آن زیات ریلیف تننگ کن راجی رکھ انا پروگرام کن فنڈز ئِ ودفنگ نا ہم گمان ارے۔ پوسکن آ مالی سال نا بجٹ اٹی راجی بشخ انا شونداری آن بیدس محصولات آتے ودفنگ کن گام گیج و گورننس اٹی گچینی اتون اوار اوار نجی بشخ اٹی زرکاری ئِ ودفنگ آہم چکار تخنگک۔
