وزیراعظم پلانٹ نا بنجائی کنٹرول روم انا دورہ و چندی بشخ آتا جاچ ئِ ہلک
ساہیوال۔ 25مئی (اے پی پی) وزیراعظم محمد نواز شریف پنچ شنبے نا دے ساہیوال کول پاور ڈٹ انا 660 میگاواٹ نا اولیکو یونٹ نا بنائِ کرینے ہرا پاک چین اقتصادی راہداری نا اولیتی ڈٹ آتیٹی اوار ئِ۔ ساہیوال کول پاور پروجیکٹ 660 میگاواٹ نا 2یونٹ آ تالان ئِ۔ ہنداوڑ دا 1320 میگاواٹ نا جم اٹنگا پیداواری کچ انا حامل ئِ ہراڑآن ملک اٹی توانائی نا کاختی ئِ مر کننگ اٹی کمک رسینگک۔ گورنر پنجاب محمد رفیق رجوانہ، وزیراعلیٰ پنجاب شہباز شریف ، بنجائی کابینہ نا باسک، پاکستان اٹی چین نا سفیر سن وائی ڈونگ و بڑزکو کمامدارآک ہم داوخت آ ساڑی ئسر۔ وزیراعظم تختی نا نقاب کشائی ئِ کرسا ڈٹ انا بنائِ کرے۔ داوخت آملکی شونداری و شونہالی و سلامتی کن دعاہم کننگا۔ وزیراعظم پلانٹ نا بنجائی کنٹرول روم نا دورہ ئِ کرے و دانا چندی بشخ آتا جاچ ئِ ہلک۔ داوخت آ وزیراعظم محمد نواز شریف ئِ تعلقدار کمامدارآک بریفنگ تسر۔ ڈٹ انا اولیکو یونٹ 12مئی 2017ءآن بجلی نا پیداوار نا بنائِ کرینے وخت اس کہ ارٹ میکو یونٹ جون انا اولیکو ہفتہ ٹی پیداوار نا بنائِ کیک و جون اسکان دا ڈٹ 1320 میگاواٹ بجلی ودی کننگ نا بنائِ کیک۔ داڈٹ قومی گریڈ تون منسلک کننگانے۔ بنجائی و پنجاب حکومت ڈٹ انا پوروی ٹی پبی کمک کریر۔ کولا نا ترسیل کن پنجاب حکومت پاکستان ریلویز ئِ وام تسنے و ڈٹ انا ہند اسکان کولا نا سرسہبی آن فراوانی آن جاری ئِ۔ دوئی سرجم احوال آتا رداٹ ڈٹ آن سالانہ 9 ارب کلو واٹ بجلی نا پیداوار نا اومیتی ئِ۔ بنجائی ہند آ واقع مننگ نا بناءآ لین لاسز بے کچ کم مریک۔ وزیراعظم محمد نواز شریف 30 مئی 2014ءآ ڈٹ انا بنداو ئِ تخاسس۔
