بنجائی وزیر ڈٹ بندی شونداری و اصلاحات پروفیسر احسن اقبال نا پشاور آن صحافی تا ڈل اتون ہیت وگپ

اسلام آباد۔ 25مئی (اے پی پی) بنجائی وزیر ڈٹ بندی شونداری و اصلاحات پروفیسر احسن اقبال پارینے کہ میڈیا نا کڑد فی زمانہ بے کچ اہمیت اختیار کرینے۔ جنگ آک پٹ آتیٹی آخا میڈیا نا کمک اٹ کننگرہ، ننا قومی بیانیہ ئِ بگڑیفنگانے، 35سال اسکان ڈکٹیٹر داڑے اقتدار اٹی مننگ نا جواز ئِ پٹسا کریر، ننے مون آ ہِننگ کن شونداری آ چکار تخوئی مریک، جان جوڑی ، تعلیم ، پبلک ہیلتھ و غذائیت نا ویل آتیا چکار تخسا میڈیا ئِ مثبت کڑد ادا کروئی مرے۔ ملکی برآمد آتے ودفنگ کن ننے معیار، پیداواریت وجدت آ چکار تروئی مریک، خیبر پختونخوا و بلوچستان اٹی جوڑ مروک آ شاہراہ تا سوب پسماندہ علاقہ غاتیٹی شونہالی بریک۔ سی پیک نا پوروی کن یکسوئُ، دانا پن ئِ بدل کننگ کن ہچ ئُ سلاہ اس غور اٹی اف، دا بلٹ اینڈ روڈ فورم نا باقاعدہ بشخ اس جوڑ مسنے۔ داخیال آتا درشانی ئِ بنجائی وزیر احسن اقبال داڑے پشاورآن صحافی تا ڈل اسے تون ہیت وگپ کرسا کرے۔