وزیراعظم محمد نواز شریف نا وژن نا رداٹ 19سال پد مردم شماری نا عمل جوانی اٹ پورو مس، ہراڑآ مچ آ قوم مبارکباد نا حقدار ئِ
اسلام آباد۔ 25مئی (اے پی پی) وزیر مملکت اطلاعات، نشریات و قومی میرات مریم اورنگزیب پارینے کہ وزیراعظم محمد نواز شریف نا وژن نا رداٹ 19سال پد مردم شماری نا عمل جوان وڑاٹ پورو مسنے ہراڑآ مچ آ قوم مبارکباد نا حقدار ئِ۔ مردم شماری نا عمل نا پوروی آن پد ٹھوس بنداو تیا جامع راجی ومعاشی ڈٹ بندی نا پین کسرملنگک۔پنچ شنبے نا دے جاری کروک تینا بیان اٹی وزیر مملکت پارے کہ مردم شماری نا سرسہب پوروی آ وزیر خزانہ اسحاق ڈار و اونا ٹیم مبارکباد نا حقدار ئِ۔ اومردم شماری نا عمل اٹی شریک غٹ استاد، سیکورٹی کارندہ و مردم شماری نا عملہ ئِ اوفتا سخت خواری و قومی فرض انا پورو کننگ آ مبارکباد پیش کرے۔ مریم اورنگزیب پارے کہ دا عمل نا پوروی کن فرض انجام تروک آ غٹ ادارہ غاتے خراج تحسین پیش کیک۔ مچ آ قوم دا عمل اٹی جان تا نذرانہ تروک آ شہید آتے کن دعاگو ئُ۔ وزیر اطلاعات پارے کہ مردم شماری نا عمل نا پوروی آن پد ٹھوس بنداو تیا راجی و معاشی ڈٹ بندی نا پین کسر ملنگک۔
