اسلام آباد۔ 24مئی (اے پی پی) صدر مملکت ممنون حسین پارینے کہ پاکستان دہشت گردی نا برخلاف جنگ اٹی بھلو سرسہبی دوئی کرینے و افریقی ملک آک دہشت گردی تون مون تننگ کن پاکستان نا آزموندہ غان فائدہ ہرفنگ کیرہ۔ داہیت ئِ ایوان صدر اٹی افریقی ملک آتا سفیر آتا اعزاز اٹی تروک آ دے انا اِرغ آن تران کرسا پارے ہراٹی سویلی افریقہ، تیونس، کینیا، الجزائر، مصر، صومالیہ، سوڈان، مراکش، نائیجیریا ، ماریشیس و لبیا نا سفیر و ہائی کمشنر ساڑی ئسر۔ داوخت آ صدر مملکت افریقی یونین نا قیام نا 54می سال دے آ سفیر آتے مبارکبادی ہم تس۔ داوخت آ وزیراعظم نا سلاہکار امور خارجہ سرتاج عزیز ، سیکرٹری خارجہ تہمینہ جنجوعہ و ایلو بڑزکو کمامدارآک ہم ساڑی ئسر۔ صدر مملکت پارے کہ دہشت گردی نا برخلاف جنگ اٹی پاکستان بھاز قربانی تسنے و داسہ اللہ تعالیٰ نا فضل اٹ دانا بھلو حد اسسکان مون ئِ توننگانے۔ اوپارے کہ افریقی ملک آک دا چرجوئی ٹی پاکستان نا آزموندہ غاتیان فائدہ ہرفنگ کیرہ۔ اوافریقی ملک آتے دفاع و خارجہ امور تون اوار چندی بشخ آتیٹی افسر آتا تربیت نا پیش کش ہم کرے۔ صدر مملکت پارے کہ پاکستان نا خارجہ پالیسی ٹی افریقہ نا خاص ئُ اہمیت اسے۔
