اسلام آباد۔ 24مئی (اے پی پی) صدر مملکت ممنون حسین بڑزکو تعلیم نا دوئی کننگ کن زالبول ئِ اسہ وڑوارخواہی نا فراوانی آ زورشاغسا پارینے کہ تعلیم یافتہ زالبول قومی شونداری نا مون آ دننگ اٹی اہم کڑد انا حامل ئِ۔ چارشنبے نا دے داڑے رفاہ انٹرنیشنل یونیورسٹی ٹی زالبول نا کیمپس انا بنائی دود آن تران کرسا صدر پارے کہ دا ہیت المی ئِ کہ زالبول بڑزکو تعلیم کیر و چندی شعبہ ہائے حیات اٹی تینا کڑد ئِ ادا کیر تانکہ قومی شونداری نا رفتار ترند مرے۔ صدر پارے کہ ترند رفتار شونداری کن زالبول ئِ تینا گچین کڑد ادا کروئی ئِ۔ صدر مملکت پارے کہ صنفی امتیاز نا چٹفنگ و اسہ وڑحق انا فراوانی آن ہی پسماندگی نا چٹفنگ ممکن ئِ۔ ملک انا نیمہ غان زیات آباد ی ئِ شونداری نا دنگ آن جتا تخنگ مفک۔ قومی شونداری نا مسخت آتا دوئی کن نرینہ غاتون زالبول ئِ ہم تینا بشخ ئِ شاغوئی ئِ۔ اوپارے کہ زالبول نا شرکت آن نئے بیرہ ملک انا افرادی واک دوگنامریک بلکن پرعزم استاد، بیوروکریٹس، سائنسدان ، انجینئرز و چندی بشخ آتا چاہندار تا بھلو کچ اسے ٹی دستیابی ہم المی مریک۔
