اسلام آباد۔ 24مئی (اے پی پی) وزیراعظم محمد نواز شریف پارینے کہ الس نا راجی و اقتصادی شونداری حکومت نا اولیت ئِ و بجٹ حکمت عملی دا مسخت آتا دوئی کننگ کن اسہ اہم ئُ ذریعہ اسے۔ اوداہیت ئِ چارشنبے نا دے داڑے اسہ بڑزکو کہول نا دیوان اسے نا کماشی ئِ کرسا پارے ہراٹی اودے مالی سال 2017-18ءکن بجٹ حکمت عملی نا بارواٹی معلومدار کننگا۔ وزیراعظم آفس نا میڈیا ونگ نا کنڈآن جاری بیان نا رداٹ وزیراعظم پارے کہ ننا حکومت بنداوی ڈھانچہ نا شونداری آ چکار تخانے ولے داڑتون اوار اوار راجی بشخ ئِ ہم اولیت تننگانے۔ اوپارے کہ مالی سا ل 2012-13ءنا نسبت مالی سال 2017-18ءکن شونداری بجٹ اٹی مسہ گنا نا بے مثل ودکی کننگانے۔ اوپارے کہ ساڑی حکومت آزاد کشمیر، گلگت بلتستان و فاٹا ئِ ہم مناسب اولیت تسنے۔ دیوان اٹی وزیر خزانہ سینیٹر محمد اسحاق ڈار ، وزیراعظم نا خصوصی کمکار ہارون اختر و سینئر کمامدارآک ساڑی ئسر۔
