واشنگٹن۔ 24مئی (اے پی پی) امریکہ ٹی پاکستان نا سفیر اعزاز احمد چوہدری پارینے کہ پاکستان و امریکہ ئِ دہشت گردی نا چٹفنگ و اوغانستان اٹی سوگو امن کن خڑکی کمکاری نا گرج ئِ۔ داڑے یونیورسٹی آف سینٹ تھامس انا ڈیپارٹمنٹ آف انٹرنیشنل سٹیڈیز و رائس یونیورسٹی نا بیکرز انسٹی ٹیوٹ آف پبلک پالیسی آن تران اٹی او جنگ زدہ ملک اوغانستان اٹی امن کن پاکستان نا کوشست آتے تالان کرسا پارے کہ اوغانستان نا ویل انا سیاسی ایسراس پٹنگ نا گرج ئِ۔ اوپارے کہ اسہ وت واجہ، سوگو و شونہال اوغانستان ، پاکستان و ڈیہہ نا فائدہ ٹی ئِ۔ اوپاکستان نا مثبت حالیت آتا ذکر ئِ کرسا سرسہب سیکورٹی آپریشن و ودوک آ اقتصادی وارخواہی تیان معلومدار کرے و پاکستان نا اسٹاک مارکیٹ، درملکی زرمبادلہ نا کوڑی و درملکی زرکاری ٹی ودکی وجہانی معاشی درجہ بندی نا ادارہ غاتا کنڈآن پاکستان نا معاشی ریٹنگ اٹی ودکی نا ذکر ئِ کرے۔ اوپارے کہ پاکستان و امریکہ نا تعلقداریک 7 عشرہ غاتا وخت آ محیط ئُ و اوفتے تینا تعلقداری تے پین سوگو کننگ نا گرج ئِ۔ سفیر اعزاز احمد چوہدری پارے کہ ہڑتوم آ ملک آک کشت وکشار ، صنعت، تعلیم، واپار، زرکاری و جان جوڑی تون اوار چندی بشخ آتیٹی کمک کننگ ئُ۔ اوپارے کہ دُن تو سرد جنگ و نائن الیون نا واقعہ غاتیان پد تعلقداری تیٹی شیفی بڑزی بس ولے ہڑتوم آ ملک آک بھلو وخت اسے آن اسہ ایلو تون کمک کریر۔ اوپارے کہ تاریخ ثابت کرینے کہ پاکستان و امریکہ ہراتم اواری اٹ کاریم کریر او زیات سرسہب مسر۔ داوخت آ سوج و ورندی نا ہم دور اس مس ہراٹی پاکستانی سفیر اوغانستان اٹی امن و بھارت و ایلو ہمسایہ ملک آتون گچین تعلقداری تے کن پاکستان نا خواہش نا درشانی ئِ کرے ۔ بھلو کچ اسے ٹی یونیورسٹی نا طالب علم ، فیکلٹی نا باسک ، میڈیا نا نمائندہ و ایلو مہمانک ہم ساڑی ئسر۔
