لاہور۔ 24مئی (اے پی پی) پاکستان امن پسند ئُ ملک اسے ہرا تینا اقتصادی و سیکورٹی فائدہ غاتا دوئی کن کوشست کننگ ئِ، ساڑی حالیت آتیٹی اسہ سوگوئُ بحری فورس اسے نا گرج مست انا نسبت زیات شدت تون محسوس کننگ انگ ئِ، داہیت انا درشانی ئِ 46می پاکستان نیوی اسٹاف کورس انا کانووکیشن آن تران اٹی پاک بحریہ نا سروک ایڈمرل محمد ذکاءاللہ کرے۔ 46می پاکستان نیوی اسٹاف کورس انا کانووکیشن نا دود پاکستان نیوی وار کالج لاہور اٹی اڈ ہلک۔ پاک بحریہ نا سروک ایڈمرل محمد ذکاءاللہ دود انا مہمان خاص ئس۔ مہمان خاص پاک بحریہ، پاک آرمی، پاک فضائیہ نا 43و سنگت ملک اردن، انڈونیشیائ، بنگلہ دیش، چین، سری لنکا ، سعودی عرب، متحدہ عرب امارات، ملائیشیا ، مصر ، میانمر و نائیجیریا نا 20 آفیسر آتے وار سٹیڈیز (میری ٹائم) اٹی ماسٹر ز نا ڈگری تفویض کرے۔ دود آن تران کرسا ایڈمرل محمد ذکاءاللہ پارے کہ وسیلہ و اثرورسوخ نا پٹنگ تغیر پذیر و بے المی دنیا ٹی ہمسری و پوسکن آ صف بندی ئِ ودی کیک۔ ننا ڈیہہ ٹی ملک آتا چکار سمندر نا کنڈآ مبذول مننگ ئِ و بحری فوج ئِ اسٹریٹجک و روایتی وڑاٹ شونداری تننگ کن بھلو زرکاری اس کننگ انگ ئِ۔ اوار اوار ننا ڈیہہ ٹی غیر علاقائی بحری فوج انا بھلو کچ اسے ٹی ساڑی گری ہم دا ہیت انا دلیل ئِ۔ اوپارے کہ پاکستان اسہ پرامن ئُ ملک اسے ہرا تینا روا اقتصادی و سیکورٹی فائدہ غاتا دوئی کن کوشست کننگ ئِ ۔ ولے ساڑی حالیت آتیٹی اسہ سوگو ئُ بحری فورس اسے نا گرج مست انا نسبت زیات شدت تون محسوس کننگ انگ ئِ۔ گریجویٹنگ آفیسرآتے پنت و شون کرسا نیول چیف داہیت آ زورشاغا کہ قائد نا حیثیت آن آفیسر تے کسبی وڑاٹ جیرت مندی اتون آخبت نا چیلنج آتون بایدے مون تروئی مرے و تینا تینا ملک ئِ بحری فوج انا گچینی کن داکان دوئی کروک آ علم و مہارت آتے بایدے گچین کاریم اٹ اتنگے۔ کورس اٹی دوست ملک آتا آفیسرآتا است بڈ شرکت نا حوالہ ئِ ترسا اوپارے کہ پاکستان و پاک بحریہ نا اینو آن پد پین بیست آن زیات سفیر و دوست مریرہ و ای اومیت کیوہ کہ دوست ملک آتا دا آفیسرز پی این وار کالج اٹی کورس ٹی جوڑ کروک آ سنگت آتون تینا سنگتی ئِ قائم و دائم تخنہ۔ نیول چیف گریجویٹنگ آفیسر آتے مبارکبادی تس و کورس انا غٹ سرجزآتا اڈتننگ نا چرجوئی ٹی پاکستان نیوی وار کالج نا عزم و نیشنل ڈیفنس یونیورسٹی نا پبی کمک نا ستائِ کرے۔ داکان مست کمانڈنٹ پی این وار کالج ریئر ایڈمرل معظم الیاس کورس اٹی اوار تعلیمی و کسبی سرجزآتا مختصر ذکر ئِ کرے۔ اوپارے کہ کورس اٹی سنگت ملک آتا آفیسر آتا شرکت است بڈ ئِ و پاکستان و دا ملک آتا بحری واک آتا نیام اٹ خنوک آ برادرانہ تعلقداری تا عکاس ئِ۔ دود اٹی شرفدار آ سول شخصیت وپاکستان نا سلہہ بند فوج انا سینئر آفیسرز آک ہم شرکت کریر۔
