اسلام آباد۔ 01 جون (اے پی پی) چیئرمین سینیٹ محمد صادق سنجرانی پارینے کہ پاکستان و تھائی لینڈ نا نیام اٹ خڑکی و خوشگوار تعلقداری ءِ ہرا کیہی عشرہ غاتیا تالان ءُ، ہڑتوم آ ملک آتا نیام اٹ السی وو اپاری کہو ل آ رابطہ غاتے پین ودفنگ نا گرج ءِ۔ سینیٹ سیکرٹریٹ آن جاری بیان نا رداٹ داخیال آتا درشانی ءِ او پاکستان اٹی تھائی لینڈ نا سفیر چکرید کراچائیونگ تون گپ وتران کرسا کرے ہرا پنچ شنبے نادے آ داڑے اوڑتون اوڑدہی کرے۔ اوڑدہی ٹی ہڑتوم آ کنڈآتا تعلقداری تون اوار، تین پہ تینی است خواہی نا امور تیا گپ وتران کننگا۔ داوخت آ چیئرمین سینیٹ پارے کہ پاکستان و تھائی لینڈ نا نیام اٹ خڑکی و خوشگوار تعلقداری ءِ ہرا کیہی عشرہ غاتیا تالان ءُ۔ پاکستان اٹی رکھ کروک آیات گار آک ہڑتوم آ ملک آتا نیام اٹ دیرپا و سوگو تعلقداری تے مون آ درینو۔ تھائی لینڈ اٹی ہزار آتا کچ اٹی رہینگوک پاکستانی ہڑتوم آ ملک آتا نیام اٹ اسہ پول اسے نا کڑد ءِ ادا کننگ ءُ۔ اوڑدہی ٹی ہڑتوم آ ملک آتا نیام اٹ زرکاری ، تعلیم، سائنس و ٹیکنالوجی ٹی ہڑتوم آ کنڈآتا تعلقداری تے پین مون آ دننگ نا گرج آ زور شاغنگا، پاکستان و تھائی لینڈ نا نیام اٹ زرکاری نا اسیجاڈٹ آتا بنا ءِ کننگ نا گرج آ ہم زور شاغنگا۔ چیئرمین سینیٹ پارے کہ ہڑتوم آ ملک آتا نیام اٹ السی و واپاری کہول آ رابطہ غاتے پین ودفنگ نا گرج ءِ۔ رابطہ غاتا ودنگ آن واپاری کچ اٹی پین ودکی ممکن مریک۔ اوپارے کہ پاکستان اٹی زرکاری کن چاگڑد سازگار ءِ، تھائی پوریاگر آک ہم زرکاری نا وارخواہی تیان فائدہ ہرفر۔ اوڑدہی ٹی واپاری برادری نا نیام اٹ ڈل آتا ہن و بر آ زور شاغسا چیئرمین سینیٹ پارے کہ پاکستان اٹی درملکی زرکارآتا آسراتی کن اسپیشل اکنامکس زون جوڑ کننگ انگ ءِ۔ اوڑدہی ٹی تھائی سفیر پارے کہ پاکستان و تھائی لینڈ نا نیام اٹ ہڑتوم آکنڈآتا تعلقداری ستاکڑزک۔ پاکستانی تا مہمانداری و کلچر بھاز زہمی کرے، تھائی کمپنیک پاکستان اٹی کشاری و فوڈ پراڈکٹ آتیٹی زرکاری نا خواہندار ءُ۔ پاکستان وتھائی لینڈ تین پہ تینی تعلقداری تے پین فعال کننگ آ امنا کریر۔ چیئرمین سینیٹ تھائی لینڈ نا سفیر کن نیک است خواہی نا درشانی ءِ ہم کرے۔
