اسلام آباد۔ 01 جون (اے پی پی) بنجائی وزیر اقتصادی امور سردار ایاز صادق پارینے کہ پاکستان نا زرگزرانی شونداری ٹی یورپی یونین نا اہم ءُ کڑد اسے و نن یورپی یونین تون تینا تعلقداری تے قدر انا نظر اٹ ہرنہ۔ اوداہیت ءِ پنچ شنبے نادے آ داڑے پاکستان اٹی یورپی یونین نا سفیر ڈاکٹر رائنا کیونکا تون اوڑدہی ٹی گپ وتران کرسا پارے۔ یورپی یونین نا سفیر بنجائی وزیر ایاز صادق تون اونا ایلم نا کزیت آ ہڑزخواہی کرے۔ سردار ایاز صادق یورپی یونین نا سفیر ءِ بخیر کرے و یورپی یونین نا کنڈآن پاکستان تون کمکاری آ منت واری نا درشانی ءِکرے۔ اوپارے کہ پاکستان تون یورپی یونین نا متکن آ سنگتی و کمکاری ستاکڑزک۔ پاکستان نا زرگزرانی شونداری ٹی یورپی یونین نا پدریسہ مخ تفی نا است انا حب اٹ اعتراف ءِ کیوہ۔ یورپی یونین نا سفیر آئی پی ایس جی دیوان نا سرسہب اڈتننگ نا ستا ءِ کرے، و آئی پی ایس جی باسک آتا نیام اٹ ہم آہنگی آ زور شاغا۔ اوڑدہی ٹی سینزدہ می یورپی یونین پاکستان مشترکہ کمیشن نا ایجنڈا و تیاری تیا گپ وتران ہم مس۔ اوڑدہی ٹی پاکستان و یورپی یونین نا نیام اٹ کمکاری ءِ پین گہرا کننگ، اقتصادی تعلقداری و واپار آ چکار کننگ نا عزم انا درشانی ءِ کننگا۔ فریق آک پاکستان و یورپی یونین نا نیام اٹ کمکاری ٹی پیش رفت آ است جمی و بڑزکو کہول انا گپ وتران اٹی اوار مننگ نا عزم انا درشانی ءِ کریر۔ یورپی یونین نا سفیر پارے کہ اقتصادی تعلقداری تے سوگو وزرکاری نا وارخواہی تے مون آ دننگ پاکستان ویورپی یونین کن اہم ءِ۔
