پاکستان نا گچین آئی ٹی چاہندار، ٹائم زون و انگریزی لب ولہجہ، دنیا ٹی جتا ءُ اہمیت اس تخک، سید امین الحق

اسلام آباد۔ 01 جون (اےپی پی)) بنجائی وزیر انفارمیشن ٹیکنالوجی (آئی ٹی ) سید امین الحق پارینے کہ پاکستان نا گچین آئی ٹی چاہندار، ٹائم زون و انگریزی لب و لہجہ ، دنیا ٹی جتا ءُ اہمیت اس تخک، دنیا داسہ پاکستانی ورناتا انفارمیشن ٹیکنالوجی ٹی مہارت نا برملا اعتراف ءِ کننگ اٹی ءِ۔ پنچ شنبے نادے آ وزارت آئی ٹی آن جاری پریس ریلیز نا رداٹ داخیال آتا درشانی ءِ او مراکش اٹی گلوبل انفارمیشن ٹیکنالوجی نمائش نا بنانا وخت  آ جہانی راہشون و انفارمیشن ٹیکنالوجی نا چاہندار و کاروباری ڈل اتون اوڑدہی تیٹی کرے۔ بنجائی وزیر آئی ٹی سید امین الحق نا مراکش اٹی جائیٹکس گلوبل نمائش نا بنائی دود اٹی بشخ ہلک۔ انفارمیشن ٹیکنالوجی نا بابت مسہ دے ئی جہانی نمائش مراکش اٹی 31 مئی آن 2 جون اسکان برجاسلک۔ گلوبل انفارمیشن ٹیکنالوجی نمائش اٹی مچ آ دنیا غان 400 آن زیات ٹیک کمپنی و جہانی ڈل شریک ءُ۔ سید امین الحق نا کماشی ٹی ڈل اٹی ممبر آئی ٹی جنید امام، چیئرمین پاشازوہیت خان ئسک اوار ءُ۔ جائیٹکس نمائش اٹی اولیکو وار پاکستان آن 14 کمپنی، 10 اسٹارٹ اپس و 200 آن زیات آئی ٹی چاہندارآک شریک ءُ۔ سید امین الحق نمائش اٹی پاکستان پویلین نا بناءِ کرے، و چندی ملک آتا ڈل آتون اوڑدہی کرے۔ بنجائی وزیر آئی ٹی نا سیکرٹری جنرل ، ڈیجیٹل کمکار تنظیم گودی دیمہ الیحیٰ تون ہڑتوم آ کنڈآتا باندات آتیا اہم اوڑدہی مس۔ سید امین الحق ہواوے نا صدر کولن ہُوتون اوڑدہی، ہواوے پویلین نا دورہ ءِ ہم کرے۔