اسلام آباد۔ 01 جون (اے پی پی) وزیرخارجہ بلاول بھٹو زرداری اردن ناشاہی خاہوت نا سلہ غا ولی عہد حسین نا برام اٹی بشخ ہلنگ کن اردن اٹی ءِ۔ داہیت ءِ دفترخارجہ نا ترجمان ممتاز زہرا بلوچ پنچ شنبے نادے آ داڑے پریس حوال اٹی پارے۔ اوپارے کہ اردن نا دورہ غان پد وزیرخارجہ بلاول بھٹو زرداری عراق نا نائب وزیراعظم و وزیرخارجہ ڈاکٹر فواد ھسین نا سلہ غا 5 آن 7 جون اسکان عراق نا دورہ ءِ کیک۔ دا وزیرخارجہ نا عراق نا اولیکو دورہ مریک ، دورہ ٹی وزیرخارجہ عراقی سرکڑدہ غاتون اوڑدہی کیک۔ عراقی ہم منصب تون اوڑدہی ٹی فریق آک اسیجائی است خواہی نا چندی امور تیا گپ وتران کیرہ و ہڑتوم آ کنڈآتا کمکاری نا کسرتے پٹرہ۔ وزیرخارجہ بلاول بھٹو زرداری پاکستانی زائر آتا آسراتی کن کربلاٹی زائر آتا سینٹر نا جوڑ کننگ نا باضابطہ پڑو ءِ کیک و سفارت خانہ نا کمپلیکس نا بنداو ءِ ہم تخک۔ وزیرخارجہ نا دورہ ءِ عراق اٹی ہڑتوم آ ملک آتا نیام اٹ تعلیم نا بشخ، دودوربیدگی کمکاری و ویزانا آسراتی نا بابت چندی معاہدہ غاتیا دستخط ہم گمانی ءِ۔
