فارورڈ آپریشنل بیس(سکردو) ۔24مئی (اے پی پی) پاک فضائیہ نا سروک ایئر چیف مارشل سہیل امان چارشنبے نا دے قادری ایئر بیس نا دورہ ئِ کرے و پاک فضائیہ نا مشق و عملی تیاری تا جاچ ئِ ہلک۔ اوتینٹ ہم مشق آتیٹی بشخ ہلک و میراج جہاز ئِ 20 آن 35منٹ اسکان بال تس ہرا کم و ود 60 سالہ متکن آ جنگی جہاز ئِ۔ ذرائع ابلاغ نا نمائندہ غاتون ہیت وگپ کرسا ایئر چیف پارے کہ دا مشق آک پی اے ایف نا معمول نا تربیت نا بشخ ئُ۔ اوپارے کہ پاک فضائیہ موثر جنگی لائخی تخوک ئُ فورس اسے و دا ہمہ وخت تینا آپریشنل تیاری ئِ المی جوڑ کیک۔ ایئر چیف سہیل امان پارے کہ پی اے ایف گدرینگوک آ دونیم سال آن بے کچ کسبی وڑاٹ آپریشن ضرب عضب اٹی بشخ ہلسا دنیا ٹی تینے گچین ئُ فورس اس ثابت کرینے وخت اس کہ ضمنی نسخان نا اسہ واقعہ اس ہم پیش بتنے حالانکہ دنیا ٹی ٹاپ ورلڈ فورس آتا کنڈآن داوڑنا کروک آ آپریشن تیٹی ضمنی نسخان رپورٹ مریک۔ پاک فضائیہ نا سروک پارے کہ پاک فضائیہ دہشت گردی نا برخلاف جنگ اٹی غٹ آپریشن تا انجام دہی کن تینا برادر سلہہ بند فوج اتون ہم کوپہ ئِ۔ بھارتی ایئر چیف نا ساڑی آ بیان نا بارواٹی سوج انا ورندی ئِ ترسا سہیل امان پارے کہ پاکستان اسہ امن پسند ئُ ملک اسے ولے اگہ دشمن مہم جوئی اس کرے تو ہندن ئُ پبی ئُ ورندی اس ایتنہ ہرادے ہمیشہ یات تخنگک۔
