اسلام آباد۔ 24مئی (اے پی پی) وزیر خزانہ سینیٹر محمد اسحاق ڈار اینخو مالی سال 2016-17 ءنا اقتصادی جاچ رپورٹ ئِ (اینو) پنچ شنبے نا دے آ جاری کیک۔ جاری مالی سال انا بابت اقتصادی جاچ رپورٹ اٹی قومی معیشت نا جم اٹنگا کارکڑد نا جاچ اتون اوار اوار آخبت نا بابت کروک آ معاشی ڈٹ بندی تے ہم مون آ تخنگک۔ اقتصادی سروے ٹی معیشت نا غٹ بھلا اہم بشخ آتیٹی کروک آ ہندی و درملکی زرکاری و شرح شونداری نا بابت حساب وکتاب پیش کننگک۔ قومی معیشت نا اہم بشخ آتیٹی کشت وکشار، مینو فیکچرنگ ، کانڑ کنی، مالیات، سرمایہ نا مارکیٹ ، افراط زر و تہہ نا و پیشن نا وام تا ادائیگی و دا بشخ آتا آخبت نا ڈٹ بندی نا سرجم جاچ ئِ پیش کننگک۔ اقتصادی جاچ رپورٹ مالی سال 2016-17ءٹی ملک انا جم اٹنگا آبادی، افرادی قوت، روزگار نا فراوانی، نیزگاری نا کچ اٹی کمتی، ٹرانسپورٹ و مواصلات وغیرہ نا بشخ آتا کارکڑد نا جاچ ئِ ہم ہلنگک۔ داکان بیدس سروے ٹی ماحولیاتی و موسمیاتی تغیرات نا سوب پیش بروک آ ویل و خراج آتا نظام اٹی گچینی و دنگ اٹی ودکی تون اوار ایلو اہم راجی و معاشی بشخ آتا ساڑی آ کارکڑد و آخبت نا ہدف آتا تعین ئِ ہم کننگک ہرا قومی معیشت نا درکار شرح نمو نا دوئی ٹی کمکار جوڑ مریک۔
