اسلام آباد۔ 24مئی(اے پی پی) وزیراعظم محمد نواز شریف پارینے کہ پاکستان پدریسہ اقتصادی شونداری نا سوب درملکی زرکاری کن شاندار ئُ وارخواہی اس پیش کننگ ئِ۔ ملک انا ریگولیٹری و سپروائزری فریم ورک بھاز شون پسند ئِ و جہانی زرکارآتے کمکار فضاءاس فراوان کیک ۔ اوداہیت ئِ سٹینڈرڈ چارٹرڈ بینک انا چیئرمین جوزے وینا لز تون چارشنبے نا دے ہیت وگپ کرسا پارے۔ وزیراعظم پارے کہ پاکستان نا بینکاری بشخ وخت تدینگ انگ تون زہمی کن و سوگو وڑاٹ کارکڑد نشان تسنے۔ اوپارے کہ نمو آ تخوک پالیسی تا سوب پاکستان نا شمار داسہ مون آ بروک آ منڈی تیٹی مریک۔ اوپارے کہ پاکستان نا اسٹاک مارکیٹ ئِ 2016ءٹی 5 گچین کارکڑد نشان تروک آ اسٹارک مارکیٹ آتیٹی اوار کننگا و ننا ساڑی آ جی ڈی پی شرح نمو 5.3درسد آن زیات ئِ۔ وزیراعظم چیئرمین سٹینڈرڈ چارٹرڈ بینک ئِ پارے کہ ٹھوس زرجاتی بنداو، اثاثہ جات و کٹیا پذیری ٹی شاندار نمو و جہانی معیار آتون ہم آہنگی پاکستان نا بینکاری نا بشخ ئِ زرکار آتے کن ڈیہہ ٹی بے کچ مسابقانہ ہند اس تسنے۔ اوپارے کہ سی پیک نا رداٹ توانائی و بنداوی بشخ جاٹ اٹی ودوک آ درملکی زرکاری تون پاکستان نا پدریسہ اقتصادی شونداری، گیشتر زرکاری وارخواہی پیش کننگ ئِ۔ وزیراعظم چیئرمین سٹینڈرڈ بینک انا دورہ پاکستان نا خیرمقدم ئِ کرسا پارے کہ اسٹینڈرڈ چارٹرڈ بینک پاکستان اٹی غٹ آن متکن و غٹ آن بھلا جہانی بینک آتیان اسٹ ئِ۔ اوجہانی معیارنا رداٹ پاکستان اٹی اسلامی بینکاری تون اوار پوسکن آ ٹیکنالوجی و جدید مالیاتی مصنوعات درستی راستی کرفنگ کن بینک انا عزم پیہم نا ستائِ کرے۔ چیئرمین سٹینڈرڈ چارٹرڈ بینک جم و جوش اٹ خیرمقدم آ وزیراعظم نا منت واری ئِ ادا کرسا پاکستان تون کمکاری ٹی پین ودکی نا درشانی ئِ کرے۔ سٹینڈرڈ چارٹرڈ بینک انا چیف ایگزیکٹو آفیسرو منیجنگ ڈائریکٹر (نارتھ ) ہم چیئرمین تون اوار ئسر۔
