اسلام آباد۔ 31 مئی (اے پی پی) بنجائی وزیر ڈٹ بندی، شونداری، اصلاحات و خصوصی گام گج پروفیسر احسن اقبال پارینے کہ وخت بسنے کہ نن غٹ پاکستانی تے مون آ اتسا ملک انا شونداری ٹی کڑد ادا کننگ ناموقع ایتن، چین نا بیلٹ اینڈ روڈ و پاکستان نا وژن 2025 ءِ اوار کرسا چین و سویلی ایشیائی ملک آتے ملفنگ نا ڈٹ ءِ، پاکستان ڈیہہ نا مسہ ارب آبادی نا مرکز جوڑ مننگ کریکہ، سی پیک اٹی 3 سال انا تہہ ٹی 29 ارب ڈالر نا زرکاری مس۔ داخیال آتا درشانی ءِ او چارشنبے نادے آ لیڈرزان اسلام آباد سمٹ آن تران کرسا کرے۔ اوپارے کہ پاکستان نا قیام نا 75 می سال دے ءِ اڈتننگ انگ ءِ۔ ولے تینا ہدف آتیان بھاز مراُن، ہراتم حکومت اٹ اولیکو وار بسن تو ملک 50 می سال دے ءِ اڈ تسکہ، نن ملائیشیا غا ہنان وژن 2020نا جاچ ءِ ہلنگ کن ہنان تو معلوم مس کہ اوپاکستان آن ہیل کرینو، ہراتم پاکستان نا اشرافیہ غا ہنان تو او پاریرہ کہ ملک ہنا اینو ہنا یا پگہ ہنا، احسن اقبال پارے کہ پاکستان نا نیزگار و لس بندغ تون تغ ئسک کہ پاکستان مشکل آن پیش تمک، سال 1998 اٹی پاکستان نا توانائی ودکی ئسک۔ وژن 2010اٹی پاریسن کہ 2006 ٹی بجلی نا کاختی مریک، سال 2008 اٹی ملک انا تہہ ٹی بجلی نا کاختی بے کچ ئسک و 18 گھنٹہ نا لوڈشیڈنگ ئسک۔ اوپارے کہ پاکستان کن غٹ آن بھلا گیم چینجر پاکستان چین اقتصادی راہداری مون آ بس، سی پیک اسہ ہندن ءُ کیچ اس ئسک ہرادے نن ہلان تو تاریخ ننے درہ خلیک ۔ پاکستان 1960 نا دہائی ٹی موقع ءِ گوہاہراتم نن آخبت نا جاپان پاننگانہ ولے 1965 نا جنگ آن پد مون آ ہِننگ کتو۔ پاکستان تون ارٹ میکو موقع 1991 ٹی ئسک۔ غٹ آن مست زرگزرانی اصلاحات سویلی ایشیاٹی درستی راستی کرفین۔
