کوئٹہ۔ 30 مئی (اے پی پی) گورنر بلوچستان ملک عبدالولی خان کاکڑ پارے کہ امن، تعلیم و جان جوڑی اول آن ننا اولیت آتیٹی اوار ءُ۔ تینا بیان اٹی اوداہیت آ است جمی نا درشانی ءِ کرے کہ صوبہ ٹی امن و ایمنی نا حالیت آتیٹی خاص گچینی بننگ ءِ، شونداری و زرکاری کن فضا سازگار مننگ اٹی ءِ۔ اوصوبہ ٹی کیہی عشرہ غاتیان پد قومی گوازی تا سرسہب اڈتننگ نا ستا ءِ کرسا پارے کہ مسلم باغ اٹی ایف سی کیمپ آ دہشت گرد آتا جلہو ءِ بے سہب کننگ و صوبہ ٹی کالعدم تنظیم نا سروک گلزار امام نا دزگیری کون آ واقعہ غاک داہیت انا شاہدی ءُ کہ کانود نافذ کروک آ ادارہ غاتا کارروائیک نتیجہ خیز مننگ اٹی ءُ۔ گورنر بلوچستان پارے کہ الس نا جان و مال انا رکھ حکومت نا زمواری ءِ و دا چرجوئی ٹی کانود نافذ کروک آ ادارہ دے و نن لگوک ءُ ۔ گورنر بلوچستان پارے کہ نن الس نا رکھوک آتا کارکڑد نا نئے بیرہ ستاءِ کینہ بلکن شہید آتا خاہوت آتا ہم ہرممکن کمک ءِ کننگ اُن اوپارے کہ اندرونی سیوت و سخا ءِ سوگو کننگ کن تین پہ تینی افہام و تفہیم ، مذاکرات و جمہوری روایہ غاتے مون آ دننگ نا سخت گرج ءِ۔
