اسلام آباد۔ 29 مئی(اے پی پی) صدر مملکت ڈاکٹر عارف علوی ایف بی آر ءِ شاری اسے نا مسہ امپورٹڈ گاڈی تا غلط نیلامی آ زر انا ادائیگی و معافی خواہنگ نا پارت کرسا بنجائی محتسب نا پرمان تا برخلاف غاو کروک آنا دائر درخواست ءِ قبول کرے۔ ایوان صدر نا پریس ونگ آن دوشنبے نادے آجاری بیان نا رداٹ صدر مملکت پارے کہ کسٹم کمامدارآک شاری ءِ بیدس نوٹس جاری کننگ آن اوان مسہ گاڈی کم و ود 30 لکھ روپئی نا کم نہاد آ نیلام کریر۔ ایف بی آر شاری آن معافی خوائے و نیال مروک مسہ گاڈی تا نہاد ءِ ادا کے۔ اوپارے کہ شاری نا کنڈآن ادا کروک آ کسٹم ڈیوٹی ہم غیرمجاز کلیئرنگ ایجنٹ آتے واپس کروک آ ہرا اوکان پد زر ہلسا غائب مس، ایف بی آر غٹ رسید/دستاویز آتے پک کے، گاڈی تا نہاد نا رداٹ زرپدی ایتے و درآمد کنندگان /مالکان ءِ ادا کروک ڈیوٹی /چارجز آتے پدی ایتے۔ صدر مملکت پارے کہ شاری غٹ دستاویز آتے فراوان کے تانکہ ایف بی آر 30 دے انا تہہ ٹی ادائیگی کننگ کے، زر انا ادائیگی ٹی منافع ءِ ہم اوار کننگے انتئے کہ نیلامی نا زر سرکاری خزانہ ٹی تموک ئسر۔ صدر مملکت بنجائی محتسب نا پرمان تا برخلاف افتخار احمد اعوان (غاو کروک) نا دائر کروک درخواست ءِ قبول کرے۔
