لاہور۔ 29 مئی (اے پی پی) بنجائی وزیر ڈٹ بندی پروفیسر احسن اقبال پارینے کہ آئینی مد پورو مننگ آ گچین کاریک وخت آ مریرہ، 90 دے انا تہہ ٹی گچین کاری تا فیصلہ سیاسی ئسک آئینی و کانودی آخا، ہموفک ہرافک مئی نا واقعہ غاتیٹی ڈوہ کریر اوفتا برخلاف شاہدی ساڑی ءِ ، اسہ پارٹی اسے تون لائخی اف کہ تنیا پاکستان ءِ مشکل آتیان کشنگ کے، پی ٹی آئی اوورسیز سوشل میڈیا نا مخلوق ہراوڑ ملکی دفاعی ادارہ غاتا برخلاف زیاری پروپیگنڈا کننگ ءُ اسہ ہم محب وطن اس اوفتا مخ تفی ءِ کپک، اینو ننے اسٹ مرسا ملک ءِ مشکل آن کشوئی مریک ، ٹیکنالوجی نا دنیا ٹی بدلی بننگءِ و ننے مون آ ہِننگ کن تینے پوسکن آ وڑتا رداٹ تینے کروئی مریک۔ اودوشنبے نادے آ داڑے انفارمیشن ٹیکنالوجی یونیورسٹی ارفع کریم ٹاور اٹی اڈ ہلوک اسہ دود اسے آن تران کریکہ۔ بنجائی وزیرپارے کہ اینو پاکستان ہراڑے سلوک ءِ اسہ لیڈر یا اسہ پارٹی اسے تون لائخی اف کہ تنیا پاکستان ءِ مشکل آتیان کشنگ کے، اینو ننے اسٹ مرسا مشکل آتیان کشوئی مریک، پاکستان اسہ ایٹمی ءُ طاقت اسے ، اگہ اسہ بندغ اس ورناتے وار وار پاہک کہ نن غلام اُن تو اونا دماغی حالیت انت مریک، اسہ ایٹمی طاقت اسے نا ورناک امر غلام مننگ کیرہ، کس اس ننے غلام مننگ نا سجفپ نن اسہ آزاد ءُ قوم اسے اُن۔ اوپارے کہ مون آ ہِننگ کن تینے پوسکن آ وڑتا رداٹ کروئی مریک، ورناتے پوسکن آ ٹیکنالوجی تون ہم گرنچ کننگ کن لیپ ٹاپ تسن، پاکستان اٹی فری لانسنگ ترندی اٹ ودنگ ءِ، فیصلہ کرینن کہ دُوارہ ورناتیکن لیپ ٹاپ اسکیم نا بناءِ کین۔ اوپارے کہ مستین نا ہمو غٹ اصول و کلیہ غاک ہرافک انسانی شونداری نا پیمانہ ءِ طے کریر او داسہ بےسہب مننگ ءُ۔ احسن اقبال پارے کہ اودے اینو لیڈنگ آئی ٹی یونیورسٹی ءِ ہُننگ نا موقع ملا، پاکستان نا ورناک تینا لائخی تیٹی کس اسے آن کم افس، اینو آن منہ سال مست نوکیا و بلیک بیری موبائل فون مارکیٹ نا بادشاہ ئسر، اینو نوکیا و بلیک بیری ٹیلی کمیونیکیشن نا عجائب گھر اٹی ءُ، انتئے کہ اوفک بدل مروک چاگڑد و ٹیکنالوجی تون تینے اپ ڈیٹ کتور داسہ مقابلہ بھاز سخت مسنے۔ اوپارے کہ ہڑدے ٹیکنالوجی نا دنیاٹی بدلی بننگ ءِ، بدلی ءِ قبول کننگے تانکہ وخت اتون چلینگ مرے، نن دا غٹ ءِ ہرسا مستین اٹ تینا حکومت اٹی وژن 2025 پلان کریسن و دا ہموخت ہراتم ملک اٹی بدترین لوڈشیڈنگ ، زرگزرانی بحران و لااینڈ آرڈر نا حالیت خراب ئسک، ننے یقین ئسک کہ داٹی سرسہب مرینہ۔ اوپارے کہ نن ایجوکیشن، ہیومن ریسورس و یوتھ ءِ ڈیجیٹلائزیشن اٹ واکدار کننگ نا مسخت نا رداٹ 2017-18ٹی 4 نیشنل سینٹر جوڑ کرین و دا ٹارگٹ نا دوئی کننگ کن ورناتیٹی لیپ ٹاپ بشخان ہراڑان فائدہ ہرفسا ای لانسنگ نا کمک اٹ ورناک اُراٹی تولوک آن لائن پیسہ کٹنگ ءُ، بروک آ سال آن میرٹ بیسڈ طالب علم آتے لیپ ٹاپ فراوان کننگک داکان بیدس آسان قسط آتیا ہم لیپ ٹاپ تننگک تانکہ ہر طالب علم تون تینا لیپ ٹاپ مرے، ننے پوسکن آ دور انا خواست آتون تینے ہم گرنچ کروئی مریک۔
