اسلام آباد۔ 29 مئی (اے پی پی) بنجائی وزیرخزانہ سینیٹر محمد اسحاق ڈار پارینے کہ اسلامی مالیات و بینکاری نیزگاری نا چٹفنگ و راج انا شونداری و شونہالی ٹی اہم ءُ کڑد اس ادا کننگ کیک، حکومت اسلامی مالیاتی صنعت ءِ مون آ دننگ اٹ سنجیدہ و سنبرینگوک ءِ، یقین ءِ کہ اسلامی بینکاری و مالیات نا رداٹ چنکا و نیامی درجہ نا کاروبار ، کشت وکشار و کم خڑچ انا اُراتا تفنگ کن مصنوعات پیش مریک، قران کریم و اسوہ حسنہ ٹی دنیا نا زرگزرانی ویل آتا ایسر ساڑی ءِ۔ دوشنبے نادے آ داڑے سیکورٹیز اینڈ ایکسچینج کمیشن آف پاکستان نا کنڈآن اسلامی کیپٹل مارکیٹ نا سرحال آجہانی کانفرنس آن تران کرسا کانفرنس اٹی بشخ ہلوک آ درملکی ڈل آتا منت واری ءِ ہرفے و پارے کہ داسرحال آ جہانی کانفرنس نا اڈتننگ آن اسلامی مالیات و اسلامی کیپٹل مارکیٹ آتا مسخت آتے مون آ دننگ اٹ کمک رسینگک۔ وزیرخزانہ پارے کہ اسلامی مالیات و اسلامی بینکاری نئے بیرہ اسلامی بلکن ایلو ملک آتیٹی ہم ترندی اٹ مون آ ہِننگ ءِ، اسلامی مالیات و بینکاری نیزگاری نا چٹفنگ و راج آتا شونداری و شونہالی ٹی اہم ءُ کڑ د اس ادا کننگ کیک انتئے کہ دا بریبری و انصاف اٹ و رسک شیئرنگ نا بنداو آ مالیاتی شمولیت آ زور شاغک و مالیاتی منڈی تے حقی زرگزران تون جاڑ تخک۔ وزیرخزانہ پارے کہ آئی ایف ڈی نا رپورٹ نا رداٹ داوخت آ مچ آ دنیا ٹی اسلامی بینکاری و مالیات نا 1679 ادارہ کاریم کننگ ءُ ہرافتیان 560 اسلامی بینک ءُ، داوخت آ اسلامی مالیاتی مارکیٹ نا کچ 4 ٹریلین ڈالر ءِ و داٹی سالانہ بنداو تیا 17 درسد نا کچ اٹ نمو مننگ ءِ، 2026اسکان اسلامی مالیاتی مارکیٹ نا کچ 5.9 ٹریلین ڈالر اسکان ودنگ نا کساس ءِ، ملائیشیا، سعودی عرب، سنگاپورو اردن داوخت آ اسلامی مالیات و بینکاری نا بابت مون آٹو۔ انڈونیشیا و ملائیشیا دابشخ اٹی تعلیم و پٹ وپول اٹ سرفہرست ءُ۔ وزیرخزانہ پارے کہ اسلامی مالیات و بینکاری نا سرحال اونا است آن خڑک ءِ۔
