اسلام آباد۔ 29 مئی (اے پی پی) چیئرمین سینیٹ محمد صادق سنجرانی ترکیہ نا صدارتی گچین کاری تیٹی شاندار سرسہبی آ صدر رجب طیب اردوان ءِ دلی مبارکباد پیش کرینے۔ سینیٹ سیکرٹریٹ آن جاری اسہ بیان اسے ٹی محمد صادق سنجرانی صدر اردوان نا شاندار کماشی و ترکیہ نا شونداری و شونہالی کن اونا لگن نا ستا ءِ کرے۔ چیئرمین سینیٹ جمہوری عمل اٹ ترک الس نا فعال بشخ ہلنگ آ اوفتے ہم مبارکباد پیش کرے۔ اوپارے کہ پاکستان و ترکیہ نا تعلقداری خڑکی، پائیدار، تاریخی، دودوربیدگی و ایلمی ءِ۔ اوصدر اردوان نا کماشی ٹی ترکی نا برجا شونداری و سرسہبی نا مخ تفی ءِ برجاتخنگ نا عزم انا درشانی ءِ کرے۔ داکان بیدس، چیئرمین سینیٹ صدر اردوان نا دانشمندانہ راہشونی ٹی جہانی چیلنج آتون مون تننگ، علاقائی سوگوی و اقوام نا نیام اٹ بھرمی کمکاری نا مون آ دننگ اٹ ترکیہ نا بے مٹ کڑد ءِ مون آ تخا۔ اوپارے کہ صدر اردوان نا دُوارہ گچینی جہانی کہول آ اسہ اہم ءُ ملک اسے نا وڑاٹ ترکیہ نا نمان ہند ءِ پین سوگو کیک ۔ چیئرمین سینیٹ تینا کلہو اٹی صدر اردوان و ترک الس کن شونہالی، امن وپائیدار شونداری نا دعا و نیک است خواہی تا درشانی ءِ ہم کرے۔
