کراچی۔ 26 مئی (اے پی پی) وزیراعظم محمد شہباز شریف پارینے کہ ویل و چیلنج آتیان پد ہم پاکستان نا ٹیکسٹائل انڈسٹری شون ہلنگ ءِ، ملک انا برآمد آتیٹی ودکی و ٹیکسٹائل انڈسٹری نا گچینی کن مالی ویل آتیان پد ہم غٹ ممکنہ وسیلہ مہیا کینہ، ٹیکسٹائل نئے بیرہ زرگزران بلکن برآمد آتیکن ہم تمبہ نا درجہ تخک۔ جمعہ نادے آ داخیال آتا درشانی ءِ وزیراعظم ٹیکسٹائل ایکسپو آن تران کرسا کرے۔ ٹیکسٹائل ایکسپو نا متنظمین آتے مبارکباد پیش کرسا وزیراعظم پارے کہ دا ایکسپوٹی پیشن نا ملک آن ہم زرکارآک شریک ءُ ہرا ستاکڑزک۔ ٹیکسٹائل نئے بیرہ ننا زرگزران بلکن برآمد آتیکن تمبہ نا حیثیت تخک۔ تینا صنعت کار و برآمد کنندگان آتا میڈان پاکستان گڑاتا دوئی کننگ کن اوفتا کوشست آتے خراج تحسین پیش کینہ۔ چندی چیلنج آتیان پد ہم پاکستان نا ٹیکسٹائل سیکٹر نا گچینی کن کوشست کننگ اُن۔ کاروباری بندغ آتا سخت خواری نا سوب آن ٹیکسٹائل نا بشخ گچین مننگ ءِ۔ زرکارآک پاکستان آ برسا خوشی محسوس کیرہ۔ ویل آتیان پد ہم پاکستان نا ٹیکسٹائل انڈسٹری شون ہلنگ ءِ۔ ٹیکسٹائل سیکٹر ننا برآمد آتا مرکز ءِ۔ اوپارے کہ پاکستان نا نیٹ ویئر و گارمنٹ آتا جہانی برانڈ نا کنڈآن مانگ، متکن آ ٹیکسٹائل ٹیکنالوجی ٹی جدت دا بشخ انا اہم مزل نا نشان ءِ۔ وزیر واپار، سیکرٹری واپار و اوفتا ٹیم و پاکستان ٹریڈ ڈویلپمنٹ اتھارٹی نا چیئرمین زبیر موتی والا نا دا بشخ انا گچینی کن نمان کارکڑد اس تخک۔ اوپارے کہ ٹیکسٹائل نا بشخ انا ملکی برآمد آتیٹی بشخ 60 درسد ءِ۔ او ٹیکسٹائل نا بشخ اتون منسلک چاہندار آتے پارے کہ او مون آ بریر و پاکستان نا برآمد و دا بشخ انا گچینی کن تینا سلاہ تے ایتر۔ وزیراعظم پارے کہ بروک آ ہفتہ غان پری بجٹ دیوان تا چرجوئی نا بنا ءِ کینہ۔ وزیرخزانہ ءِ ہم کنتون بروئی ئسک ولے او بننگ کتو، وزیر مملکت خزانہ عائشہ غو ث پاشا و خصوصی کمکار ڈاکٹر طارق باجوہ ننا برآمد آتیٹی ودکی کن پبی کڑد ادا کننگ اٹی ءُ، او کنتون اوار ءُ۔ مالی چیلنج آتون اوار ایلو مشکل آتیان پد ہم سل و ٹیکسٹائل، گواز ی تا گڑا تتون اوار ایلو مصنوعات آتا برآمد آتے ودفنگ کن ہرممکنہ وسیلہ مہیا کینہ۔ اوایکسپو نا بشخ ہلوک آتے پارے کہ او پبی سلاہ اتون مون آ بریر۔ تینا صارف آتے آب اٹ گڑاتا فراوانی ءِ پک کیر۔ بنجائی وزیر واپار سید نوید قمر پارے کہ پاکستان اٹی زرکاری کن چاگڑد بے کچ سازگار ءِ، مچ آ دنیا ءِ سلہ خلینہ کہ او میڈان پاکستان گڑاتے ہلیر۔ اوپارے کہ پاکستان نا ٹیکسٹائل مصنوعات بے کچ بڑزکو آب انا ءُ۔ روس یوکرین جنگ آن مچ آ دنیا نا زرگزران تے بحران مون تروک ءِ۔ اوپارے کہ برآمد آتے ودفسا زرگزران ءِ سوگو کننگ مریک۔ وزیراعظم نا دا ایکسپو ٹی ساڑی گری اونا ٹیکسٹائل انڈسٹری نا گچینی نا عزم اناشاہدی ءِ، چیئرمین ٹریڈ ڈویلپمنٹ اتھارٹی پاکستان زبیر موتی والا پارے کہ ٹیکسٹائل انڈسٹری پاکستان نا مخ انا ملی ءِ، پاکستان دنیا ٹی کرپاس ودی کروک آ پنچ میکو بھلا ملک ءِ۔ نن بھلو سفر اس کرینن دُواٹ جوڑ گڑاتیان پد داسہ پوسکن طرز انا مینو فیکچرنگ آ بسونن۔ اوپارے کہ نن دنیا نا ہر بھلا برانڈ آتے خذمت ایتنہ۔ پاکستان ٹیکسٹائل تینا آب انا سوب آن دنیا ٹی یکتاءِ۔ دا بشخ اٹی بھلا لائخی اس ارے۔ داسہ دا بشخ اٹی پوسکنی اتنگ اُن۔ داوخت آ وزیراعظم ایکسپو نا باضابطہ بناءِ کرے۔ داوخت آ بشخ ہلوک آک وزیراعظم تون گروپ فوٹو اس ہم کشفیر۔ وزیراعظم تون اوار بنجائی وزیر مریم اورنگزیب، احسن اقبال، گورنر سندھ کامران ٹیسوری، وزیراعلیٰ مراد علی شاہ و ایلوفک ہم ساڑی ئسر۔
