واشنگٹن۔ 26مئی (اے پی پی) امریکہ ٹی پاکستان نا سفیر مسعود خان پارینے کہ امریکہ و پاکستان نا طالب علم آک ہڑتوم آ ملک آتا تعلقداری تے مون آ دننگ اٹ تینا پبی کڑد ءِ ادا کیرہ۔ داخیال آتا درشانی ءِ او واشنگٹن اٹی پاکستانی سفارت خانہ ٹی اڈ ہلوک دود آن تران کرسا کرے۔ پاکستانی سفیر جینی ایلیمنٹری اسکول نا طالب علم آتا ٹولی نا ستاءِ کرسا پارے کہ سفارت خانہ تینا کننگ نا پروگرام مخلوق آ تالان نقطہ نظر نا کمک اٹ کثیر الثقافتی تعلقداری تا تعمیر ءِ مون آ دننگ نا اسہ گچین ءُ گام اسے۔ اوپارے کہ پاکستان نا بارواٹی طالب علم آتا علم انا ودفنگ و پاکستان و اونا مخلوق کن او ہرا ہمدردی ءِ ودی کرے او حیرت انگیز ءِ۔ طالب علم آک پاکستانی آرٹ، جغرافیہ، گوازی تا بشخ آ پریزنٹیشن تسر۔ طالب علم آک پاکستانی فن، ایلو معلومداری و کوئز اٹی ہم بشخ ہلکر پاکستانی ترانہ غا اوفتا پرفامنس ءِ ہرار۔ داپروگرام نا رداٹ گڑاس طالب علم اردو ہیل کننگ ءِ گچین کریر وخت اس کہ ایلوفک پاکستانی فن و دودوربیدہ غا چکار تخار۔ اوپاکستان آ اسہ جیوپارڈی گیم سیریز اس تیار کریر، کورس انا کماشی ءِ گریڈ فائیو نا طالبہ مارگریٹ میلیاکریکہ۔ سفارت خانہ ٹی پاکستان ایمبیسی ایڈاپشن پروگرام نا اسہ بشخ اسے نا وڑاٹ ڈی سی پبلک اسکول نا جہانی کہول آ تعلیم ءِ مون آ دننگ نا گام اسے۔ پاکستان نا سفیر امریکی و پاکستانی اسکول آتون رابطہ غاتے ودفنگ نا است خواہی ظاہر کرسا پارے کہ مخلوق نا نیام اٹ تین پہ تینی رابطہ غاتے ودفنگ نا گرج ءِ۔
