لمہ و باوہ چناتے ہروار پولیو آن بچفنگ نا پڑی ضرور کنفر، بنجائی وزیر جان جوڑی

اسلام آباد۔ 26 مئی (اے پی پی) بنجائی وزیر جان جوڑی عبدالقادر پٹیل پارینے کہ پولیو دین انا چاگڑد اٹی ساڑی مننگ چناتا جان جوڑی کن بھلوخطرہ اسے ، لمہ و باوہ ہر وار چناتے پولیو آن بچفنگ نا پڑی ضرور کنفر۔ جمعہ نادے آ وزارت جان جوڑی آن جاری بیان نا رداٹ او پارے کہ پولیو نا ہچ ءُ درمان اس اف، بیرہ ویکسین ہی چناتے مچ آ وئی نا رکھ فراوان کیک۔ اوپارے کہ ہنگو تون اوار خیبرپختونخوا نا 22 ضلع غاتیٹی 22 آن 26 مئی اسکان انسداد پولیو مہم برجاءِ۔ اولمہ و باوہ غاتیا زور شاغا کہ او چناتے پولیو آن بچفنگ نا پڑی ضرور کنفر۔ پاکستان پولیو پروگرام پدریسہ ودین انا پٹنگ اٹی ءِ و ہراڑے پولیو دین انا ساڑی گری خننگے اودے ہموڑے توننگ نا پورو لائخی تخک۔ اوپارے کہ ہنگوٹی دین انا پک مننگ آن ہنداوڑ نا آبادی نا پدرند ءِ خلنگ اٹ کمک رسینگک ہراڑے ہنکینی تا قوت مدافعت کم ءِ ، و داوڑنا علاقہ غاتیٹی پولیو و ایلو ویکسین تا فراوانی نا بست وبند ءِ کننگک۔ پاکستان اٹ برجاسال داتم اسکان بیرہ اسہ پولیو کیس و 7 مچبت چاگڑدی وڑرپورٹ مسنے۔