پشاور۔ 25 مئی (اے پی پی) وزیراعظم محمد شہباز شریف پارینے کہ 9مئی و 10 مئی نا است ہسون واقعہ غاک پاکستانی الس ءِ رنجیدہ کریر، 9مئی نا شرپسند و دہشت گرد و وطن دشمن تیٹی ہچ ءُ پرخ اس اف ، دا شرپسند آتے کانود و انصاف نا رداٹ سزا ضرور ملک تانکہ پین کس اس دُوارہ داوڑنا جیرت کننگ کپ، تاریخی و قومی  میرات ءِ خاخر تننگ حب الوطنی  اس اف، ریڈیو پاکستان نا ملازم آتا حوصلہ نا ستاءِ کیوہ، وزیرحوالکاری ریڈیو پاکستان نا زہمی ماڑی ءِ دمدستی بحالی کن گام گیج کے۔ او پنچ شنبے نادے آ ریڈیو پاکستان پشاور نا دورہ ءِ کننگ نا وخت آ گپ وتران کریکہ۔ داوخت آ وزیرحوالکاری و شینکاری مریم اورنگزیب ، ڈی جی ریڈیو پاکستان طاہر حسن ئسک ہم تران کریر و ریڈیو پاکستان  ءِ 9و 10 مئی آ توار کروک آتا دوتے اٹ ملوک آ نسخان و بحالی نا کاریم تیا حوال تسر۔ داوخت آ گورنر خیبرپختونخوا حاجی غلام علی ، نگران وزیراعلیٰ اعظم خان ، بنجائی وزیر رانا ثناءا للہ، اسحاق ڈار، احسن اقبال، سلاہکار امیر مقام و ایلوفک ہم ساڑی ئسر۔ وزیراعظم پارے کہ اینو نن غٹ ریڈیو پاکستان نا تاریخی ماڑی ءِ خنسا ڈکھیااُن۔ دا ماڑی ٹی پاکستان جوڑ مننگ آن مست ریڈیو نا سیٹ اپ ساڑی ئسک و ہنداکان لاہور آنبار 13 و14 اگست 1947نا نیامی نن آجوئی نا توار بڑز مس و مچ آ دنیا ءِ دا تاریخی ہند آن قائد اعظم نا عظیم جہد و لکھ آ مسلمان تا قربانی تیٹی پاکستان نا جوڑ مننگ ناخوشخبری ءِ بِنفنگا۔ 9و 10 مئی ٹی ہرااست ہسون واقعہ رونما مس او پاکستان اٹ رہینگوک آ 23 کروڑ الس ءِ بھاز دلی صدمہ تس و غم و غصہ نااسہ ترند ءُ ریسہ اس مچ آ پاکستان اٹ مس ۔ اوپارے کہ ہرا سینٹر آن پاکستان نا جوڑ مننگ نا خوشخبری ءِ بِنفنگا اودے حِس انا ڈھیر اس جوڑ کننگ، داکان زیات ملک دشمن مننگ کپک۔ داڑتون چاغی نا یات گار ءِ بھس کننگا، دا یات گار پاکستان نا دفاعی طاقت نا شاہکار ئسک ہرانا بناءِ ذوالفقار علی بھٹو کرے و اونا انتہا28 مئی 1998 آ مس۔ دا وخت آغٹ حکومت آک دا عظیم دفاعی پروگرام کن تینا بشخ ءِ شاغار۔ وسیلہ و توانائی تسر۔ اسہ عزم و عرق ریزی اتون دا ڈٹ  ءِ پورو کریر و داغٹ اجتماعی کوشست آتیٹی پاکستان ایٹمی طاقت مس و قیامت اسکان دشمن پاکستان نا کنڈا خراب انگا نظر اٹ ہُننگ کپک۔ دایات گار ءِ بھس کننگا۔ دا ملک دشمنی ءِ۔ اوپارے کہ ریڈیو پاکستان پشاور آن پاکستان نا نوید ءِ بنفوک آ ظہور اظہر، مصطفیٰ ہمدانی کون آ مخلوق تاریخ نا ورق آتیٹی مدام یات تخنگک۔ داڑے ساڑی آرکائیوز ءِ خاخر تننگا۔ دنیا تینا شناخت و تاریخی میرات آتے جون آن ہم زیات دوست تخک تانکہ بروک آ چینک اوفتیان فیض یاب مریر و داڑے ہمومیرات آتے خاخر تننگا۔ کاش او ڈیجیٹائز مسرہ ولے وخت  ساتھ تتو۔ صوتہ القرآن نا بشخ بچا ہراڑاللہ نا شکر گزار اُن۔ اوپارے کہ 100 سال انا ریکارڈ نا بھس مننگ است ہسونی اسے۔ دا ادارہ نا ملازم آتا حوصلہ نا ستاءِ کینہ۔ عبداللہ و نصیر ہراوڑ توار کروک آتے تورسا ٹھپی مسر اوفتا جیرت و شجاعت ءِ سلام پیش کینہ۔ ننا سلہہ بند فوج و لس شاریک مدام پاکستان نا رکھ ءِ کرینو۔ وزیراعظم داوخت آ فی الفور ملازم آتا تنخواہ تا زرتس نا پرمان جاری کرے۔ ہرانا بست وبند اینو ہی مریک۔ وزیراعظم پارے کہ اونا دورہ نمائشی اف۔ دا است ہسون واقعہ غاتیان پد ننے اندازہ مرے کہ ہرافک دا شرمناک کاریم ءِ کریر اوفتے ٹی و دہشت گرد و شمنان پاکستان اٹی ہچ ءُ پرخ اس اف۔ وزیراعظم پارے کہ ننن دا قول ءِ کینہ کہ  داوڑنا واقعہ غاتے دُوارہ مننگ کن الیپنہ۔ دشمن ہم داخہ جیرت کننگ کپک۔ دا شرپسندی ٹی اوار زموار آتے کانود  نا رداٹ ضرور سزاملک۔ وزیراعطم وزیرحوالکاری ءِ پارے کہ او ریڈیو نا ماڑی نا جوڑجاڑ نا کاریم نا دمدستی بناءِ کرفے تانکہ دا ادارہ دُوارہ پاکستان و مچ آ دنیا ٹی ننا عزم و ولولہ نا ذکرءِ کننگ کے کہ مشکل آتیان پد ہم نن قائد اعظم نا پاکستان نا تغ ءِ ضرور پورو کینہ۔