پشاور۔ 25 مئی (اے پی پی) وزیراعظم محمد شہباز شریف پارے کہ 9 و 10 مئی آ سول و دفاعی تنصیبات آتے شست کروک آ ملک دشمن تے اوفتے اوفتا کروک نا سزا تتون تو قوم ننے معاف کپک، بے گناہ تتون زیاتی مفک، سول ماڑی تیا جلہو آتا ڈوہدار تا برخلاف انسداد دہشت گردی ایکٹ وخت اس کہ دفاعی تنصیب آتیا جلہو گیر و ڈٹ ساز آتا برخلاف دفاعی ادارہ غاتے دوئی آئینی اختیار نا رداٹ کارروائی مریک۔ پنچ شنبے نادے آ گورنر ہاؤس اٹی امن و ایمنی نا بابت دیوان اٹی گپ وتران کرسا وزیراعظم پارے کہ دا دیوان ءِ منہ دے مست بٹنگ نا فیصلہ کریسن۔ مصروفیات آتا سوب آن دا دیوان مننگ کتو۔ 9و 10 مئی آ ہرا است ہسون واقعہ غاک مسر دا بابت زوم آ دیوان اس اڈتسن۔ دادے پاکستان نا سنگت نما دشمنک دہشت گردی کریر و پاکستان نا دفاعی تنصیب آتیا جلہو کرسا ہمو کاریم ءِ کریر ہرادے دشمن 75 سال اٹی کننگ کتنے۔ بنجائی حکومت صوبائی حکومت و ادارہ غاتون اواری اٹ دا فیصلہ کرے کہ سول تنصیب آتیا جلہو و پرغ وبٹ کروک آ و ڈٹ  ساز آتا برخلاف انسداد دہشت گردی ایکٹ نا کانود نا رداٹ کارروائی مریک، وخت اس کہ دفاعی تنصیب آتیا جلہو آتا برخلاف کانود ہرا اختیار ءِ دفاعی ادارہ غاتے تسنے اونا رداٹ کانودی کارروائی مریک۔ وزیراعظم پارے کہ  پارت کرینن کہ دا عمل اٹ بے گناہ اسے نسخان مف، و کس اسے تون زیادتی ہم مف ولے ہرافک بالواسطہ یا بلاواسطہ ملک دشمنی ٹی اوار ئسر یا ڈٹ بندی کریر، او غٹ دا ڈوہ اٹی اوار ءُ و اوفتے کانود نا رداٹ سزاملے۔ ایلو دروشم اٹ قوم ننے معاف کپک و اگہ نن تینا قومی فرض ءِ امانت تکسا اداکتون۔ داڑان پاکستان ءِ بے بدل نسخان رسینگک۔