اسلام آباد۔ 25 مئی (اے پی پی) بنجائی وزیر جان جوڑی عبدالقادر پٹیل پارینے کہ پاکستان و سعودی عرب جان جوڑی نا بشخ اٹی کمکاری ءِ ودفنگ آ امنا کرینو ، ہڑتوم آملک آک کوویڈ۔ 19 و چندی دینی مرض آتا ویکسین اٹ اواری اٹ ریسرچ کینہ۔ وزارت جان جوڑی آن جاری بیان نا رداٹ داخیال آتا درشانی ءِ او سعودی وزیر جان جوڑی فہد بن عبدالرحمان الجلاجیل تون گپ وتران کرسا کرے ہراجنیوا ٹی اوڑتون اوڑدہی کرے۔ وزیر جان جوڑی عبدالقادر پٹیل نا تدوک آ ہشت تُو اٹی سعودی ہم منصب تون دا ارٹ میکو اوڑدہی ئسک۔ اوڑدہی ٹی پاکستان نا جنیوا ٹی تعینات اقوام متحدہ نا نائب مندوب زمان مہدی ہم ساڑی ئسک۔ اوڑدہی ٹی جان جوڑی نا بشخ اٹی ہڑتوم آ کنڈآتا کمکاری آ سرجمی اٹ گپ وتران مس۔ پاکستان و سعودی عرب نا جان جوڑی نا بشخ اٹی کمکاری ءِ ودفنگ آ امنا کرینو۔ بنجائی وزیر پارے کہ سعودی وزیر جان جوڑی نا پاکستان تون دینی مرض و ہیلتھ سیکورٹی نا بابت اواری اٹ کاریم کننگ آ امنا کننگانے۔ بارڈر ہیلتھ سروسز پاکستان نا ادارہ گچین وڑاٹ دین آتون مون تننگ کن سنبرینگوک ءِ۔ اوپارے کہ پاکستانی ڈاکٹر، نرس و میڈیکل ٹیکنیشن آتے سعودی عرب اٹی زیات وارخواہی تننگ آ امنا کرینن۔ عبدالقادر پٹیل پارے کہ ہڑتوم آ ملک آک کوویڈ۔ 19و چندی دینی مرض آتا ویکسین اٹ اواری اٹ ریسرچ کینہ۔ عبدالقادر پٹیل سعودی عرب نا کمک اٹ گلوبل ہیلتھ سیکورٹی نا بابت اسلامی ملک آتیٹی جان جوڑی سیکورٹی نا جال اس تالان کننگ آ زور شاغانے۔ سعودی وزیر جان جوڑی پارے کہ بارڈر ہیلتھ سیکورٹی و گلوبل ہیلتھ سیکورٹی نا باندات آتیا پاکستان نا آزموندہ غان فائدہ ہرفنہ۔
