بے کچ مسابقتی دنیا نا خواست آتا رداٹ ننے تعلیم اسکان رسینگ و اسکول آتیٹی داخلہ نا کچ ءِ ودفوئی مریک، صدر مملکت

اسلام آباد۔ 24 مئی (اے پی پی) صدر مملکت ڈاکٹر عارف علوی جاچکاری سوچ انا مون آ دننگ آ زور شاغسا پارینے کہ بے کچ مسابقتی دنیا نا خواست آتا رداٹ ننے تعلیم اسکان رسینگ و اسکول آتیٹی داخلہ نا کچ ءِ ودفوئی مریک۔ او چارشنبے نادے آ ہائی ٹیک انسٹیٹیوٹ آف میڈیکل سائنسز نا (اول ایم بی بی ایس بیچ) اولیکو کانووکیشن آن تران کریکہ۔ صدر مملکت پارے کہ پاکستان اٹی 27 ملین چنااسکول آتیان پیشن ءُ۔ اوپارے کہ تقابلی وڑاٹ ہندوستان و بنگلہ دیش اٹی چناتا اسکول اٹی داخلہ نا کچ 100-98درسد ءِ۔ اوچین نا کیس سٹڈی نا حوالہ ءِ ترسا پارے کہ تعلیم و جان جوڑی نا بشخ آتیا خاص چکار نا کمک اٹ پاکستان ہشت سال آتیٹی گچین کارکڑد نا درشانی ءِ کننگ کیک۔ صدر مملکت داکان مست میڈیکل و ڈینٹل نا فارغ التحصیل طالب علم آتیٹی ڈگری، میڈل و سفتی سند بشخا۔ اوپارے کہ ملک زالبول آتا بڑزکو تعلیم دوئی کننگ آن پد کیریئرترک کننگ  ءِ سگنگ کپک، اینو لمہ و باوہ قول کیر کہ تینا دا مار و مسن  تے ملکی شونداری و خذمت آتیکن مامور کیرہ۔ زالبول آتے کاریم کننگ نا رکھ چاگڑد فراوان کننگ ریاست نا فرض ءِ ، بنجائی محتسب کون آ ادارہ مہالو آن ہی دا مسخت کن کاریم کننگ اٹی ءِ۔ اوپارے کہ پاکستان اٹی بیرہ نہہ درسد ورنابڑزکو تعلیم کن داخلہ ہلنگ ءُ ہرافتے آن لائن ایجوکیشن کون آ پوسکن آ تعلیمی ٹولز درستی راستی کرفسا ودفنگ نا گرج ءِ۔ زڑدوئی نا نہہ درسد تالانی و 40 درسد سٹنٹنگ نا حوالہ ءِ ترسا صدر پارے کہ ملک ء، دا چیلنج آتون مون تننگ کن افرادی قوت نا سخت گرج ءِ۔ اوپوسکن آ گریجویٹ آتیا زور شاغا کہ او احتیاطی نگہداشت آ زیات چکار تخر انتئے کہ پاکستان کبین آ درمان ءِ سگنگ کپک۔ اویات کرفے کہ پاکستان مہالو آن کوویڈ19 دینی مرض آتیٹی احتیاطی وڑوڈول آتے مون آ درسا نمان سرسہبی دوئی  کرینے۔