9 مئی نا واقعہ غاتا تاریخ اٹی درور ملیپک ہراتم شہید آتا بے شرفی ءِ کننگا، فوجی تنصیب آتیا جلہو کننگا، وزیر دفاع خواجہ محمد آصف

اسلام آباد۔ 24 مئی (اے پی پی) وزیردفاع خواجہ محمد آصف پارینے کہ 9 مئی نا واقعہ غاتا پاکستان نا 75 سالہ تاریخ اٹی درور ملیپک ہراتم شہید آتا بے شرفی ءِ کننگا، فوجی تنصیب آتیا جلہو کننگا اوفتا پد اٹ ڈٹ بندی و گندہ انگا مسخت آک ئسر، پرتشدد واقعہ و فوجی تنصیب آتیا جلہو آتیا پاکستان تحریک انصاف آ پابندی تا جاچ ءِ ہلنگ اُن، عمران خان فوج ءِ تینا حریف تصور کرینے، دزگیر دوبہ دارآک پاننگ ءُ کہ دا ڈٹ آتا مہالو آن ڈٹ بندی ئسک، عمران خان نا کروک آ گام گیج آتیان بھارت اٹی خوشی کننگا۔ چارشنبے نادے آ اسلام آباد اٹی میڈیا تون گپ وتران کرسا اوپارے کہ 98 مئی نا وعاقعہ غاتا ہرا شاہدی مون آ بسنے اوڑان پیدوار مریک کہ دا غٹ ءِ اسہ ڈٹ بندی اسے نا رداٹ کننگا، اونا تینا مخلوق دادے پک کننگ ءُ کہ دانا ڈٹ بندی اسہ سال آن مسکہ و بھاز انگا شاہدی مون آ بس و اونا تینابندغ آک اعتراف کریر کہ عمران خان کیہی وار بریف کرے کہ اگہ اودے دزگیر کننگک تو ولدا ردعمل اٹ داغٹ ءِ کروئی ءِ، دا اونا آخیریکو چم ئسک، داوڑنا عزم ہندوستان نا تو مننگ کیک پاکستانی اسے نا آخا، عمران خان نا دا گام گیج آتیا بھارت اٹی جشن کننگا و داپاننگاکہ دا ننا فائدہ غاتے مون آ دننگ نا کوشست اسے، مستین اٹ مسلم لیگ (ن) و پیپلزپارٹی نا ہم اختلاف ئسک ولے وخت اس ہم داوڑنا انتہاپسندی یا فوج ءِ شست کننگتنے۔ عمران خان تینا اقتدار نا جنگ اٹی فوجءِ فریق کننگ ءِ۔ اوپارے کہ 9 مئی آ گندہ انگا مسخت آتا رداٹ کور کمانڈر نا اُراغا جلہو کننگا، پشاور اٹی ریڈیو پاکستان نا ماڑی ءِ خاخر تننگا، شہید آتا یات گار و فوجی تنصیب آتے شست کننگا ، دا غٹ ءِ ڈٹ بندی اٹ کننگا۔