اسپیکر قومی اسمبلی نا کوشست آتیان گوجرخان پنجاب یونیورسٹی کیمپس نا جوڑ کننگ کن سی ڈبلیو پی نا کنڈآن 4 ارب روپئی جتا

اسلام آباد۔ 24 مئی (اے پی پی) اسپیکر قومی اسمبلی راجہ پرویز اشرف نا کوشست آتیان گوجرخان پنجاب یونیورسٹی کیمپس نا جوڑ کننگ کن سی ڈبلیو پی نا کنڈآن 4 ارب روپئی جتا کننگا۔ داوخت آ سپیکر قومی اسمبلی راجہ پرویز اشرف اہلیان گوجرخان و خطہ پوٹھوہار نا ورناتے دا تاریخی گام آ مبارکبادی ترسا پارینے کہ پوسکن آ تعلیم آن آراستہ خطہ پوٹھوہار اونا متکن آ تغ ئسک  ہراداسہ پورو مننگ والا ءِ ہراڑکن اونا تدوک آ مسہ دہائی آن جہد برجائسک۔ چارشنبےنادے آ قومی اسمبلی سیکرٹریٹ نا رداٹ اسپیکر پارے کہ پنجاب یونیورسٹی پوٹھوہار کیمپس گوجر خان راولپنڈی نا خطہ پوٹھوہار و گوجر خان نا تاریخ نا غٹ آن بھلا ڈت و کنا ڈیہہ نا ورناتے کنا کنڈآن ٹیکی ءِ۔ اسپیکر قومی اسمبلی پارے کہ انشاءاللہ نن تینا ورنامار و مسن تے بھلا شار تیا گدریفنگ نا جاگہ غا گوجرخان اٹی ہی تعلیم ایتنہ۔ گوجر خان اٹی پنجاب یونیورسٹی پوٹھوہار کیمپس گوجر خان راولپنڈی نا جوڑ کننگ آن گوجر خان و کیبی علاقہ غاتا طالب علم آتے بڑزکو تعلیم نا چرجوئی ٹی ایلو شار تیا ہنوئی تمپک۔ اوپارے کہ بڑزکو تعلیم نا چرجوئی ٹی طالب علم آتے مون تروک مشکل و تعلیم نا بشخ اٹی مون تروک ویل آتے ایسر کننگ اونا بطور السی نمائندہ اولی زمواری ءِ۔ تدوک آ مسہ دہائی آن علاقہ ٹی تعلیم نا مون آ دننگ کن کوشست کننگ اُٹ۔ اوپارے کہ پنجاب یونیورسٹی پوٹھوار کیمپس گوجر خان راولپنڈی نا جوڑ  مننگ آن ڈیہہ  انا طالب علم آتے بڑزکو تعلیم دوئی کننگ نا وارخواہی فراوان مریک۔ اسپیکر قومی اسمبلی پارے کہ جی ٹی روڈ آ یونیورسٹی کن جتا جاگہ بڑزکو تعلیمی سرجزآتیکن بھاز جوان  ءِ۔ دا جاگہ جہلم، گوجر خان، میرپور، ڈووڈیال، چکوال و آزاد کشمیر تون اوار ایلو کیبی علاقہ غاتا سنگم آ واقع ءِ۔ گوجر خان اٹی پنجاب یونیورسٹی پوٹھوار کیمپس گوجرخان راولپنڈی  نا جوڑ مننگ آن کشمیر، جہلم ، چکوال، کلرسیداں تون اوار پنجاب نا ایلو علاقہ غاتیان تعلق تخوک آ طالب علم آک ہم فائدہ ہرفرہ۔