کوئٹہ۔21مئی (اے پی پی):ایم ڈی پی ٹی وی سہیل علی خان ءَ پی ٹی وی سیٹر کوئٹہ ءِ تر ءُ تاب کت ءُ پروڈکشن ءِ کد ءُ بالاد آنی چار ءُ تپاسی گپت۔ اے موہ ءَ آئی ءَ ریجنل لینگویجز آنی درستاں چہ مستریں نیٹ ورک پی ٹی وی بولان ءِ اولی ٹرانسمیٹر ءِ بنگیج ھم کت۔ نوکیں ٹرانسمیٹر انسٹالیشن ءَ چہ بولان ءِ ٹیلی کاسٹ نوں یو ایچ ایف ءَ لس انٹینا ءَ ھم چارگ بوت کنت۔ ڈائریکتر انجینئرنگ عارف نور ءُ انجینئرنگ مینیجر کوئٹہ سینٹر سید نبو جان آغا ءَ آئی ءَ را ٹرانسمیٹر پٹ کنگ ءُ ٹیلی کاسٹ کنگ ءِ ھوالگ ءَ بریف کت۔ 500 واٹ ٹرانسمیٹر ءِ پٹ کنگ ءَ چہ پد بولان ءِ ٹیلی کاسٹ نیٹ ورک گیش بوتگ۔ نوں بولان ءِ ٹیلی کاسٹ ھما دمگ آنی تہ ءَ چارگ بوت کنت ھمودا کہ کیبل یا ڈش انٹینا ءِ آسراتی ھم مہ بیت۔ گمان انت کہ ٹرانسمیٹر انسٹالیشن ءَ چہ پد گیش 30 ءَ چہ 3 لکھ مردم پی ٹی وی فیملی ءِ بھر جوڑ بنت۔ ایم ڈی پی ٹی وی سہیل علی خان ءَ کوئٹہ ءَ ورچوئل سٹوڈیوز جوڑ کنگ ءِ حکم ھم دات۔ تر ءُ تاب ءَ جنر مینیجر سید فہیم شاہ ءَ نیوز ، کرنٹ افیئرز ءُ پروگرام آنی بابت ءَ بریف کت۔ آئی ءَ را گوشگ بوت کہ کوئٹہ سنٹر ءَ چہ براہوئی، بلوچی ءُ پشتو زبان آںی تہ ءَ پروگرام ٹیلی کاسٹ کنگ بیت۔ سی بی اے مشعل یونین ءَ ھم ایم ڈی پی ٹی وی ءَ چہ گند ءُ نند کت۔ ایم ڈی سہیل علی خان ءَ کوئٹہ سینٹر ءَ ٹیکنیکل ایریا ءَ ھوار ایندگر سیکشنز آنی ھم تر ءُ تاب کت۔ ہیڈ آف ڈپارٹمنٹس ءَ وتی وتی شوبگ آنی زمہ واری ءُ پرفارمنس آنی بابت ءَ بریف کت۔
