اسلام آباد۔ 19 مئی (اے پی پی) وزیردفاع خواجہ محمد آصف پارینے کہ پاکستان اٹی سیاسی بحران ضرور ارے ولے بھاز زوت اونا مون ءِ توننگک، 9 مئی آ راولپنڈی ، میانوالی و لاہور اٹی پرتشدد واقعہ غاتیٹی پی ٹی آئی نا سلہہ بند جتھ آک عسکری تنصیبات آتیا جلہو کریر، پاکستان اٹی داکان مست ہم دزگیری مرسا کرینے ، ای ہم دزگیر مسوسٹ۔ جہانی نشریاتی ادارہ ’’الجزیرہ‘‘ تون گپ وتران کرسا وزیردفاع خواجہ محمد آصف پارے کہ کنا لیڈر و کنا سیاسی پارٹی نا چندی بندغ آک دزگیر مسوسر ولے نن وخت اس ہم بیدادی نا سیاست کتون، نن دزگیری تیا وخت اس ہم عسکری و سول تنصیبات آتیا جلہو کتون، عسکری و سول تنصیبات آتیا جلہو کروک آک ملک دشمن ءُ۔ اوپارے کہ ننا سیاسی اختلاف ضرور ارے ولے دانا مطلب دااف کہ سرکاری و السی ملکیت آتیا جلہو کننگے، پی ٹی آئی نا شرپسند آک سجفوک ءُ ڈٹ اسے نا رداٹ عسکری تنصیبات آتون اوار السی و سرکاری ملکیت آتیا جلہو کریر، داوڑنا عمل پاکستان نا برخلاف جنگ انا مترادف ءِ۔ اوپارے کہ ہرافک عسکری تنصیبات ، ملٹری بیس و عسکری شخصیت آتا ہنکین تیا جلہو کریر ، اوفتا ٹرائل آئین اٹ تروک وڑوڈول نا رداٹ ملٹری کورٹس انا رداٹ مریک، نن پوسکن ءُ عدالت و پوسکن ءُ کانود جوڑ کپننگ اُن، مہالوآن کانود ساڑی ءِ، داوڑنا دوبہ دارآتون ہائی کورٹ و ولدا سپریم کورٹ اٹی اپیل نا حق مریک۔ اوپارے کہ نن حالیت آتا مون ءِ توننگ نا کوشست کننگ اُن۔ شار تیٹی امن بحال مسنے۔ اوپارے کہ بروک آ منہ دے اٹی حالیت آک مست آنبار مریرہ اوپارے کہ گچین کاریک اکتوبراٹی تینا وخت آمریرہ۔
