پاکستان و ایران نا نیام اٹ معاہدہ غاتیان بلوچستان اٹی واپاری سرجزآتیٹی ترندی و بدامنی ٹی کمتی بریک، بنجائی وزیر مولانا عبدالواسع

کوئٹہ۔ 19مئی (اے پی پی) بنجائی وزیر ہاؤسنگ اینڈ ورکس مولانا عبدالواسع پارینے کہ بنجائی حکومت ایران، اوغانستان تون اوار غٹ ہمسایہ ملک آتون گچین و خوشگوار تعلقداری خواہک، پاکستان و ایران نا نیام ٹ چندی معاہدہ غاتیا دستخط آن بلوچستان اٹی زرگزرانی و واپاری سرجزآتیٹی ترندی بننگ آن بدامنی نا واقعہ غاتیٹی کمتی بریک، ایران آن سد میگاواٹ بجلی نا فراوانی آن پد مکران نا گیشتر علاقہ غاتیٹی بجلی نا ویل بھلو حد اسسکان ایسر مریک و مند، تربت، پنجگور و گوادر نا الس ءِ اڑزان بجلی نا فراوان ممکن مننگ کیک۔ جمعہ نادے آ تینا بیان اٹی بنجائی وزیر ہاؤسنگ اینڈ ورکس مولانا عبدالواسع پارے کہ نن اوغانستان تون ہم گچین تعلقداری نا خواہندار اُن انتئے کہ ہمسایہ ملک آتا نیام اٹ واپاری سرجزآتا بناکننگ آن بلوچستان اٹی روزگار نا پوسکن ءُ وارخواہی بننگ آن صوبہ شونداری و شونہالی نا کنڈا کاہک، اوپارے کہ ایران و پاکستان نا نیام اٹ ہراوڑ بجلی نا فراوانی و ٹریڈ بناکننگ آن ہرامعاہدہ مسنے دا معاہدہ بلوچستان نا گچین مفاد اٹی ءِ و نن ایران تون اوار غٹ ہمسایہ ملک آتون گچین تعلقداری کن کوشست کننگ اُن انتئے کہ دا گچین تعلقداری تا بناآ نن شونداری نا کسر تیا ہِننگ کینہ ، بنجائی وزیر ہاؤسنگ اینڈ ورکس مولانا عبدالواسع پارے کہ وزیراعظم شہباز شریف ایرانی کمامدارآتون اواری اٹ واپاری سرجزآتا بناءِ کننگ تون سد میگاواٹ بجلی نا فراوانی آن پد مکران نا گیشتر علاقہ غاتیٹی بجلی نا ویل بھلو حد اسسکان ایسر مریک۔