وزیراعظم محمد شہباز شریف ایران نا صدر سید ابراہیم رئیسی تون اوڑدہی ٹی ہڑتوم آ کنڈآتا تعلقداری تا غٹ پلو آتیا گپ وتران کیک، ممتاز زہرہ بلوچ

اسلام آباد۔ 18 مئی (اے پی پی) وزیراعظم محمد شہباز شریف اینو پاکستان ایران سیم آٹی ءِ ہراڑے او ایران نا صدر سید ابراہیم رئیسی تون اوڑدہی کیک۔ دفترخارجہ نا ترجمان ممتاز زہرہ بلوچ پنچ شنبے نادے آ داڑے پریس حوال اٹی پارے کہ ہڑتوم آ راہشونک اوڑدہی ٹی ہڑتوم آ کنڈآتا تعلقداری نا غٹ پلو آتیا گپ وتران کیرہ و پاکستان ایران تعلقداری تے پین سوگو کننگ کن کمکاری نا پوسکن آ بشخ آتے پٹرہ۔ ترجمان پارے کہ وزیراعظم و ایرانی صدر مند۔پشین بارڈر کراسنگ پوائنٹ آ مند پشین بارڈر سسٹینینس مارکیٹ پلیس و پولان ۔ گبد بجلی ٹرانسمیشن لائن نا بنا ءِ کیرہ۔ ترجمان پارے کہ مند۔ پشین بارڈر سسٹینینس مارکیٹ پلیس ہمو شش بارڈر مارکیٹ آتیان اسٹ ءِ پاکستان۔ ایران سیم اتون تفنگرہ  داڑکن مفاہمت نا یات داشت آ 21 اپریل 2021 آ دستخط کننگاسس۔ اوپارے کہ سیمی بازار تا تصور پاکستان۔ایران سیم آ مخلوق نا آسراتی کن سیم پار واپار اٹی ودکی ، اقتصادی شونداری ءِ مون آ دننگ و ہندی کاروبار کن وارخواہی تا پوسکن آ کسر تے ملنگ نا رداٹ کننگانے۔ ترجمان پارے کہ پولان۔گبد بجلی نا فراوانی لائن تدوک آ سال جولائی ٹی بنجائی وزیر توانائی نا دورہ ایران اٹی ہڑتوم آ حکومت آتا نیام اٹ طے مروک آ معاہدہ غا عملدرآمد کن تیار کننگانے۔ 132 کے وی ٹرانسمیشن لائن مکران ڈویژن نا بجلی نا ٹرانسمیشن لائن نا کمک اٹ ایران آن ہلوک آ بجلی سیمی مکران ڈیہہ نا گرج ءِ پورو کیک۔ پولن گبد نا کسر ودکی 100 میگاواٹ بجلی صوبہ بلوچستان اٹی اُرا و کاروباری ادارہ غاتا توانائی نا گرج آتے پورو کننگ اٹ کمک ایتک۔