وزیراعظم شہباز شریف نا پارت آ ماؤنٹ ایورسٹ ءِ سرکروک آ ارٹ میکو پاکستانی زالبول  کوہ پیما نائلہ کیانی ءِ ستارہ امتیاز تننگ نا نوٹیفکیشن جاری

اسلام آباد۔ 17 مئی (اے پی پی) وزیراعظم محمد شہباز شریف نا پارت آ دنیا نا بڑزکو انگا ٹُل ماؤنٹ ایورسٹ ءِ سروک آ ارٹ میکو پاکستانی زالبول کوہ پیما نائلہ کیانی ءِ ستارہ امتیاز تننگ نا نوٹیفکیشن ءِ جاری کننگانے۔ چارشنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ نائلہ کیانی ءِ ستارہ امتیاز تننگ ناباضابطہ نوٹیفکیشن جاری کننگانے۔ دا بابت وزیراعظم آفس سیکرٹری کابینہ ءِ ضابطہ ناکارروائی ءِ پورو کننگ نا پارت کرینے۔ وزیراعظم شہباز شریف قوم انا کاٹم ءِ گمر اٹ بڑز کننگ آ نائلہ کیانی کن ستارہ امتیاز نا اعزاز نا پڑو کریسس۔ یات سلے کہ ثمینہ بیگ اولیکو زالبول پاکستانی ئسک ہرا2013ٹی ماؤنٹ ایورسٹ ءِ سرکریسس۔