نن زوت سیچوان و پنجاب نا کاروباری برادری ءِ اوار کننگ کن اسہ پلیٹ فارم اس جوڑ کینہ، پاکستانی سفیرمعین الحق

اسلام آباد۔ 17 مئی (اے پی پی) چین اٹی پاکستانی سفیر معین الحق پارینے کہ نن زوت سیچوان و پنجاب نا کاروباری برادری ءِ اوار کننگ کن اسہ پلیٹ فارم اس جوڑ کینہ، نن نمے غٹ ءِ دانا بشخ مننگ نا سلہ خلینہ۔ داخیال آتا درشانی ءِ او چینگڈو ٹی چائنا پاکستان اکنامک اینڈ کلچرل ایکسچینج  انکیوبیشن سینٹر اٹی چین نا سیچوان و چونگ چھنگ نا علاقہ نا 50 کاروباری ادارہ غاتون تینا اوڑدہی ٹی کرے۔ کمرشل قونصلر غلام قادر ہم میٹنگ اٹی بشخ ہلک و پاک چین کمکاری نا پوسکن آ پیش رفت و گمان تیان معلومدار کرے۔ اوپارے کہ کشت وکشار اسہ اہم ءُ بشخ اسے و نن دا بشخ اٹی بھاز سوگو اُن۔ اوپارے کہ ای نمے داپاننگ خواوہ کہ پاکستان نا ڈیری مصنوعات آتا برآمد نا پروٹوکول پوروی نا خڑک ءِ۔ داڑان 10 بلین امریکی ڈالر نا مارکیٹ ملنگک۔ اسہ پین تعلقدار بشخ اس سُو ءِ، نن اسہ تُوآن ہم کم وخت اٹی اولیکو وار پاکستانی خراس ناسُو چین ءِ برآمد کننگ کن تیار اُن۔ خیسن آ مرچی و ایلو گڑاتا بابت ننا پروٹوکول نا ہم منظوری ءِ تننگک۔ مثلا18 چینی ادارہ غاتیان چیری ہلوک آتا اولیکو ٹولی پاکستان آ سرمسنے۔ داوخت آغلام قادر پارے کہ چین اٹی 30 ملین مسلمان ءُ ہراڑے حلال کن و خور نا بھاز زیات خواست ءِ و اونا خراس نا سُو انا نہاد پاکستان اٹی خراس نا سُو انا نہاد نا مقابلہ ٹی کم و ود 3 گناءِ۔ پاکستان سیچوان چیمبرآف کامرس نا چیئرمین لی ہونگ ووپارے کہ او چارسال آن زیات وخت آن پاکستانی  خراس نا سُو چینگڈولااتنگ نا کوشست کننگ ءِ۔ داسما تما بھاز خوشی مس کہ چینل بالاآخر ملنگ انگانے۔ کناخیال اٹ سیچوان و پاکستان نا نیام اٹ آخبت اٹ واپاری کمکاری زیات آن زیات ہموارمریک۔ غلام قادر پارے کہ نن اگست اٹی کراچی ٹی اسہ جہانی ءُ فوڈ اینڈ ایگریکلچر ایکسپو اس اڈتننگ والااُن۔ ننے اومیت ءِ کہ چینگڈو آن 50 آن زیات کمپنی داٹی بشخ ہلیرہ۔ اوپارے کہ پاکستان چینی مینو فیکچرنگ نا بروک آ مرکز مریک، ننتون بھلو رقبہ و آبادی اسے، و سیچوان و چونگ چھنگ نا علاقہ ٹی پوسکن آٹیکنالوجی ءِ، نن نمے غٹ ءِ زرکاری و نقل مکانی کن پاکستان آ بننگ آ بخیر اٹ پانہ۔