اسلام آباد۔ 16 مئی (اے پی پی) وزارت و قومی جان جوڑی و خذمت نا کنڈآن قومی اسمبلی ءِ پاننگانے کہ منکی پاکس دین انا توننگ کن وزارت جان جوڑی نا کنڈآن بارڈرہیلتھ سروس تون اوار غٹ تعلقدار ادارہ غاتے چوکس سلنگ نا پارت کننگانے، پاکستان اٹی دا دین انا بابت این سی او سی پورو نظر تخانے۔ عالیہ کامران نا ملک اٹی منکی پاکس نا تالانی نا بابت چکاری نوٹس نا ورندی ءِ ترسا پارلیمانی سیکرٹری جان جوڑی ڈاکٹر شازیہ ثوبیہ پارے کہ 2022 اٹی دنیا نا چندی ملک آتیٹی دا ننا مون آ بس۔ پاکستان اٹی سعودی عرب آن بروک آ اِرا مسافر آتیٹی دا مرض انا پیدواری 17 اپریل 2023 آ مس۔ دافتیان اسٹ اٹی دا دین خننگا۔ نن وزارت جان جوڑی نا غٹ تعلقدار ادارہ غاتے پارت کرینن، این سی او سی ہم دا بابت پورو وڑاٹ مستعد ءِ، پاکستان اٹی دا مرض انا تالانی نا گمان نظر بفنگ ءِ۔ پارلیمانی سیکرٹری ڈاکٹر شازیہ ثوبیہ دا رداٹ باسک آتا کنڈآن چست کروک آ سوج آتا ورندی ٹی پارے کہ وزارت جان جوڑی و این سی او سی بارڈر ہیلتھ سروس ءِ ہم پارت کرینوکہ پاکستان اٹی داخل مروک آ شکبر مریض ءِ ٹیسٹ کرسا آئسولیٹ کننگے ہراتم اسکان پی سی آر نا ٹیسٹ رپورٹ بفک مریض ءِ آئسولیشن اٹ تخرہ۔اسہ پین سوج اسے نا ورندی ٹی اوپارے کہ دادین کورونا غانبار تالان مریک، زیات تر دا نزور قوت مدافعت تخوک آ بندغ و پڈپُر آ زالبول آتیٹی تالان مریک اگہ دین انا تالان مننگ نا زیات گمان نظر برے تو اونا ویکسین و آئسولیشن نا بست وبند ءِ کننگک۔
