اسلام آباد۔ 16 مئی (اے پی پی) اسپیکر قومی اسمبلی راجہ پرویز اشرف سے شنبے نادے آ پارلیمنٹ لاجز نا دورہ ءِ کرے۔ داوخت آ چیئرمین پبلک اکاؤنٹس کمیٹی (پی اے سی ) نورعالم خان ، قومی اسمبلی سیکرٹریٹ و سی ڈی اے نا بڑزکو کمامدارآک ہم ساڑی ئسر۔ اسپیکر قومی اسمبلی راجہ پرویز اشرف ءِ پارلیمنٹ لاجز اٹی زیر تعمیر ودکی فیملی سویٹ آ سی ڈی اے نا کنڈآن حوال تننگا۔ اسپیکر قومی اسمبلی نیو پارلیمنٹ لاجز نا تفنگ اٹ بھلو ہرے اس مننگ آ سخت ترندی نا درشانی ءِ کرے و ڈٹ اٹ ہرے نا جاست وپاست ءِ کننگ نا پارت کرے۔ اسپیکر نا پاننگ ئس کہ نیو پارلیمنٹ لاجز نا تفنگ نا ڈٹ 2011ٹی بناکرے ہراداتم اسکان پورو مننگ کتنے۔ تدوک آ 13 سال آن ڈٹ انا خڑچ اٹی کیہی گناودکی مسنے۔ ڈٹ انا تفنگ اٹ ہرے نا سوب آن پارلیمنٹ نا باسک آتے رہینگ نا چرجوئی ٹی مشکل آتون مون تروئی تمنگ ءِ۔ پارلیمنٹ لاجز اٹی ودکی فیملی سویٹ نا ڈٹ مہالوآن ہی بھاز تاخیر نا گواچی مسنے۔ اسپیکر قومی اسمبلی سی ڈی اے ءِ ڈٹ ءِ زوت پورو کننگ نا پارت کرے و ڈٹ انا تاخیر نا باندات آتیا سجفنگ کن بڑزکو کہولی میٹنگ اس بٹفنگ نا فیصلہ کرے و پارے کہ میٹنگ اٹ چیئرمین و ڈپٹی چیئرمین سینیٹ، ڈپٹی اسپیکر قومی اسمبلی ، چیئرمین پی اے سی ، وزیر خزانہ و وزیر پلاننگ اینڈ ڈویلپمنٹ ءِ بٹنگ انگک۔
