اسلام آباد۔ 11 مئی (اے پی پی) دفترخارجہ پارینے کہ ایتھوپیا نا وزیر مملکت خارجہ امور مسگانوآریگا پاکستان نا سرکاری دورہ غااسلام آباد اٹی ءِ، دورہ ٹی پاکستان و ایتھوپیا سائنس و ٹیکنالوجی، واپار و کمکاری آ چکار کننگ تون اوار اوار تین پہ تینی است خواہی نا چندی ہڑتوم آ کنڈآتا امور تیا گپ وتران کیرہ۔ ترجمان دفترخارجہ ممتاز زہرہ بلوچ پنچ شنبے نادے آ داڑے پریس حوال اٹی پارے کہ ایتھوپیا نا وزیر مملکت خارجہ امور سے شنبے نادے آ پاکستان نا دورہ غا سرمسوسس، پاکستان آ بننگ آن پد او وزیرخارجہ بلاول بھٹو زرداری تون اوڑدہی کرے۔ او اینو پنچ شنبے نادے آ وزیر مملکت امور خارجہ حناربانی کھر تون اوڑدہی کیک و ایتھوپیا نا سفارت خانہ نا بنائی دود اٹی ہم بشخ ہلیک۔ ترجمان پارے کہ ہڑتوم آ ملک آک سائنس و ٹیکنالوجی، واپار و تین پہ تینی است خواہی نا ایلو ہڑتوم آ کنڈآتا امور تیا گپ وتران کیرہ۔ اوپارے کہ ایتھوپیا نا وزیر مملکت خارجہ امور نا دورہ نا وخت آ کراچی و ادیس ابابا نا نیام اٹ ایتھوپین ایئرلائنز نا اولیکو براہ راست جہاز آتا ہم بناءِ کننگانے۔ اوپارے کہ ڈل اٹی ایتھوپیا نا سائنس و ٹیکنالوجی، واپار و علاقائی یکجہتی نا وزرائے مملکت و کاروباری برادری نا باسک آک ہم اوار ءُ۔
