اسلام آباد۔ 11 مئی (اے پی پی) اسٹیٹ کونسل آف عمان نا ڈپٹی چیئرمین شیخ ڈاکٹر الخطاب بن غالب بن علی الحنائی اسپیکر قومی اسمبلی راجہ پرویز اشرف تون پنچ شنبے نادے آ پارلیمنٹ ہاؤس ٹی اوڑدہی کرے۔ قومی اسمبلی سیکرٹریٹ نا رداٹ عمان نا پارلیمانی ڈل آئین نا گولڈن جوبلی نا دود انا چرجوئی ٹی قومی اسمبلی سیکرٹریٹ نا کنڈآن جہانی آئینی کنونشن اٹی بشخ ہلنگ کن پاکستان نا سرکاری دورہ غاٹی ءِ۔ اسپیکر قومی اسمبلی پارے کہ عمان اٹی رہینگوک آ پاکستانیک ملک انا راجی و اقتصادی شونداری ٹی اہم ءُ کڑد اس ادا کننگ اٹی ءُ۔ او بھلو کچ اسے ٹی پاکستانی کارندہ غاتا شاندار مہمانداری آ عمان نا الس و حکومت نا ستاءِ کرے۔ اسپیکر آئین نا گولڈن جوبلی دود آتیٹی عمان نا بشخ ہلنگ نا ستاءِ کرے۔ داوخت آدوستانہ تعلقداری تا وڑآ گپ وتران کرسا اسپیکر پارے کہ پاکستان عمان تون تینا برادرانہ تعلقداری تے بھاز اہمیت ایتک۔ اوڈیہہ ٹی امن و سوگوی ءِ سوگو کننگ اٹ عمان نا کڑد انا ہم ستاءِ کرے۔ ڈاکٹر الخطاب اسپیکر نا خیرخواہی آ تالان ہیت آتا ستاءِ کرسا پارے کہ عمان پاکستان ءِ تینا ایلم تکک۔ اوپارلیمانی فرینڈ شپ گروپ نا کمک اٹ پارلیمانی رابطہ غاتے ودفنگ نا گرج آ ہم زور شاغاتانکہ چندی بشخ خاص وڑاٹ موسمیاتی بدلی تیٹی کمکاری نا کسر آتے پٹنگ مرے۔ اوڑدہی ٹی ایم این اے ناز بلوچ ہم ساڑی ئسک۔
