اسلام آباد۔ 09 مئی (اے پی پی) وزیراعظم محمد شہباز شریف پارینے کہ عمران خان وزیر آباد جلہو نا مذمت نا قابل واقعہ ءِ گھٹیا سیاسی مسخت آتے کن کاریم اٹ ایس، اونا سیاست دروغ، یوٹرن و ادارہ غاتیا گمراہ کن جلہو آتون عبارت ءِ، عمران خان نا اقتدار آن بے دخلی آن پد پاک فوج ءِ بدنام کننگ کن جوڑ کروک آ ٹرول بریگیڈ نا مننگ تون دشمن نا ضرورت اف، سلہہ بند فوج انا شہید آتا برخلاف عمران خان وزیر آباد جلہو آن مست ہم پاک فوج و انٹیلی جنس ادارہ غاتا بے شرفی ءِ کریکہ۔ سے شنبے نادے آ پی ٹی آئی چیئرمین عمران خان نا ٹویٹ نا ورندی ٹی وزیراعظم شہباز شریف اودے مخاطب کرسا پارے کہ داٹی ہچ ءُ شک اس اف کہ نا سیاست نا سفت صریحادروغ ، یوٹرن و ادارہ غاتیاگمراہ کن جلہو آتون عبارت ءِ۔ دانا مسخت عدلیہ ءِ تینا منشانا رداٹ شیف کننگ و داوڑنا برتاؤ کننگ ءِ دُن کہ نے آ ہچ ءُ کانود اس لاگومفک۔ وزیراعظم پارے کہ او (وزیراعظم ) تینا ٹویٹ اٹی انتس کہ عمران خان نا بارواٹ پارینے و تدوک آ گڑاس سال تا راستکی تیان پک ءِ۔ وزیراعظم تینا ٹویٹ اٹی عمران خان آن جوابا سوج کرے کہ انت اقتدار آن بے دخلی آن پد پاک فوج ءِ بطور ادارہ بدنام کننگ نا(عمران خان) نا سیاست اٹ وار وار مننگ والا عمل اف؟۔ انت نی وزیرآباد جلہو آن مست فوج و انٹیلی جنس ایجنسی نا سرکڑدہ غاتا بے شرفی ءِ کننگ نا سیبو ءِ ہلتویس؟ ہڑدے ئی بنداو آ دھڑکو تننگ و سٹی دوبہ خلنگ آن بیدس نی ہرا کانودکسر ءِ اختیار کریس؟ نی بنجائی حکومت نا کنڈآن کمکاری نا سلہ ءِ مسترد کریس و کانودی کارروائی نا بائیکاٹ کریس۔
