عمران خان نا حساس ادارہ غاتا کمامدارآتیا دوبہ خلنگ مذمت نا قابل ءِ، سینیٹر شیری رحمان

اسلام آباد۔ 09 مئی (اے پی پی) بنجائی وزیر چاگڑدی بدلی سینیٹر شیری رحمان پارینے کہ عمران خان نا کنڈآن حساس ادارہ غاتا کمامدارآتیا دوبہ خلنگ بے کچ خطرناک و مذمت نا قابل ءِ۔ سے شنبے نادے آ تینا ٹویٹ اٹی اوپارے کہ عمران خان بیدس شاہدی آن دوبہ خلنگ ءِ  داوڑنا بے بنداو و اشتعال انگیز دوبہ غاتیان تینا کارندہ غاتے ہُشکا تننگ ءِ۔ بنجائی وزیر پارے کہ اسہ کنڈا ادارہ غاتیا دوبہ تو ایلو کنڈآ اوفتے تون اوڑدہی تا خواست کننگ ءِ۔ عمران خان آ تدوک آ سال 3 نومبر آ جلہو مس ہرانا نن غٹ مذمت ءِ کرین، جنوری 12 اسکان اونا پنجاب اٹی حکومت جوڑ ئسک، اونا صوبائی حکومت دا جلہو نا بابت انت جاست وپاست کرے؟ شیری رحمان پارے کہ مسکوہی وزیراعلیٰ پنجاب تینٹ عمران خان نا دوبہ غاتے مسترد کرینے۔ عمران خان پاننگ ءِ کہ کرپٹ مخلوق نا برخلاف ایکشن ہلنگ آن ادارہ غاتا ساکھ ودک ولے تینا دورا ٹی او تینا وزیر آتا کرپشن آ کس اسے نا برخلاف ایکشن ہلتو۔