پاکستان و امریکہ نا توانائی نا رکھ، چاگڑد دوست و قابل تجدید توانائی نا بشخ آتیٹی کمکاری کن روڈ میپ اس تیار کننگ آ اتفاق

اسلام آباد۔ 09 مئی (اے پی پی) پاکستان و امریکہ توانائی نا رکھ و چاگڑد دوست و قابل تجدید توانائی نا بشخ آتیٹی کمکاری کن روڈ میپ اس تیار کننگ آ امنا کرینو۔ امریکہ ٹی پاکستان نا سفارت خانہ غان جاری بیان نا رداٹ وزیر مملکت  پیٹرولیم مصدق ملک یو ایس ٹریڈ اینڈ ڈویلپمنٹ ایجنسی(یو ایس ٹی ڈی اے) ٹی انڈوپیسیفک نا ریجنل ڈائریکٹر ویریندر افائیک و یو ایس ٹی ڈی اے ٹی انڈوپیسیفک ریجن نا کنٹری منیجر تنوی مدھو سودنن تون اوڑدہی ٹی  توانائی نا رکھ ءِ پک کننگ، موسمیاتی بدلی و پاکستان آ اونا راجی و اقتصادی اثرآتا بابت امور آ گپ وتران کریر۔ اوڑدہی ٹی فریق آک سرکاری و نجی بشخ آتیٹی چاگڑد دوست و قابل تجدید توانائی نا بشخ اٹی کمکاری کن روڈ میپ اس تیار کننگ آ ہم امنا کریر۔ دا چرجوئی ٹی امریکہ فزیبلٹی اسٹیڈیز کن مالی و تکنیکی مہارت فراوان کیک۔ اوڑدہی ٹی امریکی کمامدارآک پاکستان اٹی گرین امونیا، گرین ہائیڈرو جن و قابل تجدید ذریعہ نا بابت ڈٹ آتے مون آ دننگ اٹ است خواہی ظاہر کریر۔ مصدق ملک پارے کہ پاکستان امریکہ تون اواری اٹ پدتموک دنیا ٹی ساف و چاگڑد دوست توانائی نا مون آ دننگ کن کڑد ادا کیک۔ مصدق ملک امریکی زرکارآتے پاکستان اٹ توانائی نا بشخ آتیٹی گمان تا جاچ ءِ ہلنگ و اسیجائی ڈٹ آتا بناءِ کننگ کن پاکستان نا دورہ ءِ کننگ نا سلہ خلک۔