پولیو نا برخلاف جنگ اٹی متحداُن و پولیو نا برخلاف اسیجائی کوشست آتے برجاتخنہ، عبدالقادر پٹیل

اسلام آباد۔ 08 مئی (اے پی پی) بنجائی وزیر جان جوڑی عبدالقادر پٹیل پارینے کہ پولیو نا برخلاف جنگ اٹی متحداُن و پولیو نا برخلاف اسیجائی کوشست آتے برجاتخنہ۔ دوشنبے نادے آ وزارت آن جاری بیان نا رداٹ بنجائی وزیر پارے کہ پاکستان و اوغانستان دنیا ٹی اِرا واحد ملک ءُ ہراڑے پولیو دین ساڑی ءِ و داڑکن ہڑتوم آتا نیام اٹ دین انا منتقلی نا خطرہ مدام ساڑی مریک۔ دین انا ساڑی گری گڑتی نا ہیت اس ضرور ارے ولے دین انا دمدستی پک کننگ آن نن تینا چناتے پولیو آن بچفنگ کن المی گام گیج کننگ کینہ۔ اوپارے کہ خیبرپختونخوا نا ضلع پشاورو ہنگو آن ہلوک آ چاگڑدی وڑتیٹی پولیو دین پک مسنے۔ اوخواست کرے کہ چاگڑد اٹی پولیو دین انا ساڑی گری ہر چناڑکن خطرہ اسے۔ چناتے مچ آ وئی نا معذوری آن بچفنگ کن المی ءِ کہ لمہ و باوہ تینا چناتے مئی نا تُو اٹی مروک آ پولیو مہم و بروک آ غٹ مہم آتیٹی پولیو نا رکھی پڑی ضرور کنفر۔ قومی ادارہ جان جوڑی ، اسلام آباد اٹی جوڑ قومی پولیو لیبارٹری نا رداٹ پشاور و ہنگوآن 10 اپریل آ ہلوک آ چاگڑدی وڑتیٹی پولیو دین پک مسنے، ہرا جینیاتی وڑاٹ اوغانستان نا صوبہ ننگرہار اٹی ساڑی دین اتون منسلک ءِ۔ اولمہ و باوہ غاتیا زور شاغسا پارے کہ :’’ چاگڑد اٹی پولیو دین انا ساڑی گری ہر چناڑکن خطرہ اسے۔ چناتے مچ آ وئی نا معذوری آن بچفنگ کن المی ءِ کہ لمہ و باوہ تینا چناتے مئی نا تُو اٹی مروک آ پولیو مہم و بروک آغٹ مہم آتیٹی پولیو نا رکھی پڑی ضرور کنفر۔ کوآرڈی نیٹر قومی ایمرجنسی آپریشن سینٹر ڈاکٹر شہزاد بیگ پارینے کہ دین مخلوق تون اسٹ آن ایلو جاگہ غا منتقل مریک و چاگڑدی وڑتیٹی دین انا پک مننگ بے گمانی اف۔ اومستی پارے کہ ’’داکان مست جنوری ٹی لاہور نا چاگڑدی وڑتیٹی ہم پولیو دین خننگاسس ہرانا جینیاتی تعلق ننگر ہار اٹی پولیو دن اتون ئسک، ولے پولیو پروگرام نا سخت کوشست آتا سوب آن دین پین علاقہ سے ٹی تالان مننگ کتو۔ ڈاکٹر شہزاد بیگ مستی پارے کہ ’’نن سیم انا ہڑتوم آ کنڈ ویکسی نیشن و رابطہ غاتے پین سوگو کننگ کن قومی ایمرجنسی آپریشن سینٹر اوغانستان و صوبائی اآپریشن سینٹر آتون اواری اٹ کاریم کننگ اُن۔ ننے یقین ءِ کہ نن دا دین انا تالانی نا مون ءِ تورنہ۔ پاکستان اٹی مہم نا بنا15مئی آن مریک ہراٹی ہنگوو پشاور تون اوار اوغانستان تون گنڈوک یونین کونسل آتیٹی 2.3 کروڑ چناتے پولیو آن بچفنگ نا ویکسین تننگک وخت اس کہ اوغانستان ٹی مہم نا بناء 14 مئی آ مننگ ءِ۔ برجاسال داتم اسکان پاکستان آن پولیو نا اسہ کیس اس رپورٹ مسنے و پنچ چاگڑدی وڑتیٹی پولیو دین پک مسنے۔ پولیو آن پنچ سال اسکان نا وئی نا چناک زہمی مریرہ۔ داناجوڑی آن چناک مچ آ وئی کن معذور مریرہ۔ حتی کہ چناتا مرک ہم واقع مننگ کیک۔ پنچ سال آن کم وئی چناتے پولیو نا پڑی کنفسا دا موذی دین ءِ تالانی آن بچفنگ مریک۔ وار وار پولیو نا پڑی کُنفنگ آن دنیا نا غٹ ملک آک پولیو آن پاک مسنو۔ پولیو تور مہم اٹی زیات آن زیات بشخ ہلنگ ننا غٹ انا قومی فرض ءِ۔